SECTIONS
Tuesday , May 22, 2018

Lapu-Lapu police nag ala Kupido

"NAPUNO sa gugma" ang Dakbayan sa Lapu-Lapu sa dihang ang kapulisan ug ang City Government ning-andam og mga gimmick, diin ang Lapu-Lapu City Police, sa ilang talagsaong paagi, nigamit sa Valentine’s Day sa padayon nilang kampanya batok sa illegal drugs.

Nahimong “Mr. Kupido” ang mga PNP personnel sa Police Community Relation (PCR) branch sa LLCPO nga nagsul-ob og pako sa anghel ug nagdala-dala og pana.

Nangahimuot ug ning-agik-ik ang mga mangumprahay ingon man ang mga lab-asera sa merkado publiko nga gipangtunolan og red paper roses ug leaflets kabahin sa responsibilidad sa ginikanan sa pagmatuto sa ilang anak nga malikay sa illegal drugs.

Una kining higayon nga ang kapulisan migamit sa mao nga paagi sa propaganda batok sa illegal drugs human gibalik ang Oplan Tokhang sa kapulisan.

Adunay mga motorista nga nahibulong sa pagtuo nga checkpoint ang diha sa karsada sa Barangay Poblacion kay sila gipahunong.

Nakapahiyom ang mga dray­ber sa dihang gitunolan sila og mga buwak.

Ang pakulo gipangulohan ni PSupt. Regie P. Real, hepe sa PCR, kinsa nipasabot nga ilang gipahaom ang maong kalihokan atol sa kasaulogan sa adlaw sa gugma.

Sumala pa ni Real nga ang Valentine’s Day di lang saulogon sa duha ka mga nilalang nga nagkahigugmaay ang Va­lentine’s Day, apan ngadto ni bisan kinsa nga angay pahinungdan sa pagmahal.

“Bahala’g mabuang sa gugma, dili lang sa droga,” hugot ni P02 Ritchie Torcino, PCR PNCO.

Samtang ang Lapu-Lapu City government nihalad sab Valentine’s Day presentation sa nagkadaiyang publikong lugar sa siyudad pinaagi sa flash mob nga gitapok-an sa mga tawo ilabi na sa PUJ Terminal sa Pajo, Muelle Osmeña ug uban pa.


VIEW COMMENTS