SECTIONS
Wednesday , May 23, 2018

MisOr zero casualty sa Bagyong Basyang

TALIWALA pipila ka mga lungsod sa Misamis Oriental ang apektado sa pag-land fall sa Bagyong Basyang niadtong Martes apan walay natalang casualty.

Gibutyag ni Misamis Oriental Provincial Disaster Risk Reduction Management Department head Jun Dy nga mapasalamaton lamang sila nga walay natalang kaswalidad sa tibuok Misamis Oriental.

Apektado ang lungsod sa Talisayan gumikan gibaha ang Barangay sa Sta. Ines. Adunay upat ka mga gagmay’ng landslide sa Barangay Pangpangon, nakasinati og pagbaha ang Barangay Tagbocboc ug Barangay San Jose nga adunay balay nga naguba.

Lakip sa apektado ang lungsod sa Sugbongcogon, Binuangan, Salay, Lagonglong ug dakbayan sa Gingoog samtang sa weste nga bahin apektado ang lungsod sa Alubijid, El Salvador ug Manticao diin adunay na-report nga duha ka bata nga hapit naanod apan natabang ra sa ilang amahan.

Sa kasamtangan, padayon pa nga gisuta ang damyos sa infrastruktura.

Matud ni Dy nga subo lamang siya nga adunay pipila ka mga residente sa Misamis Oriental nga usa pa pwersahang nibakwit nga delikado na ang ilang kahimtang taliwala nga niaging adlaw pa gilusad ang preemptive evacuation.

"Sa sunod kon adunay mga susama niini nanghinaot ko nga magpatoo gyod kon pabakwiton na daan kay alang man kini sa inyong seguridad." Hangyo ug panawagan ni Dy.

Nakadayeg

Samtang gidayeg sa Office of the Civil Defense ang buhatan sa Provincial Disaster Risk Reduction Management Department (PDRRMD) sa Misamis Oriental ug Cagayan de Oro City Disaster Risk Reduction Management Department (CDRRMD).

Gibutyag ni OCD-Northern Mindanao Director Rosauro Arnel Gonzales nga nakadayeg siya sa pagpangandam nga gihimo sa duha ka buhatan tungod kay walay kaswalidad nga nahitabo sa dakbayan sa Cagayan de Oro ug Misamis Oriental.

Gipasabot niini nga isip naa sa OCD kinahanglan sila moasistar sa buhatan sa Disaster Risk Management Office aron mahibaloan kon unsay extent sa disaster.

Ang objectives niini mao ang zero casualty.

Dugang niini nga usa ang media ug social media ang nakatabang aron mapahibalo ang pagpangandam nga himoun kon kanus-a mobakwit panahon sa kalamidad.

Mapasalamaton kini sa mga lakang nga gihimo sa PDRRMD UG CDRRMD tungod kay giantisipar na daan ang posibleng mahitabo kon mohapak ang bagyong Basyang ug napangandaman gayud kini.


VIEW COMMENTS