HINGPIT nang ipahunong sa Kapitolyo ang pagpangayo og bayad alang sa paggamit sa mga ambulansiya sa mga district ug provincial hospital nga gidumala niini.
Duna na’y gipanday nga guidelines ang Provincial Health Office kon kinsa ang makagamit ug kanus-a mahimong magamit ang mga ambulansiya.
Ubos sa Economic Enterprise Council (EEC) sa Kapitolyo, dunay mga serbisyo nga kolektahan og bayad sa Provincial Government aron usab makahipos og pundo ang kagamhanan.
Usa sa ilang kolektahan og bayad mao ang pag-gamit sa mga ambulansiya nga anaa diha sa gidumala nila nga mga district ug provincial hospitals.
Apan gitug-an ni Provincial Health Officer Doctor Rene Catan nga hugot nang gimando ni Gobernador Hilario Davide III ang pagpatangtang sa bayranan alang sa pagamit sa mga ambulansiya.
Giklaro ni Catan nga magpaabot ang ilang opisina sa written order labot niini, ilabi na kay kinahanglan man og pagtugot sa Hunta Probinsiyal kon amendahon ang ordinansa nga nagtugot sa pagpaningil niini.
Gawas nga wa nay bayranan alang sa paggamit sa ambulansiya, giklaro usab ni Catan nga di sab bayran sa mga pasyente o sa tagtungod niini ang driver ug nurse nga maoy mouban kanila diha sa ambulansiya.
Subay sa libre nga pagpagamit sa mga ambulansiya, duna hinuoy gipanday nga lagda ang PHO labot sa kon kinsa lang ang makagamit niini ug kon kanus-a kini mahimong magamit.
Giklaro ni Catan nga kinahanglang ipagamit lang kini panahon sa emerhensiya ingon man pagbalhin sa mga pasyente sa laing tambalanan.
Buot pasabot nga kini limb and life threatening ngadto sa pasyente.
Ikaduha, mahimo lang kining mapagamit sa mga indigent.
Hinuon kinahanglan pang makig-coordinate sa local nga kagamhanan, diin nagpuyo ang pasyente.
Kon available ang LGU ambulance, hayan nga mao kini ang ipagamit. Kon dili, diha na gamiton ang ambulansiya sa tambalanan.
Di na usab kinahanglang mobayad pa sa gasolina ang mga pasyente kay abagahon ra kini sa tambalanan.