MAKATULO na ko ka higayon nga nakasikad sukad ko nibalik sa pagpasingot. Niadtong Dominggo, unang higayon nga nibalik ko sa pagsikad sa Barangay Guba, bukirang dapit sa dakbayan sa Sugbo. Didto nako natino nga ang pagsemento sa karsada gikan sa Barangay Pulangbato, nahuman ra gyud.
Kon ikaw taga Talamban, mahimong moagi ka sa dapit padung sa lungsod sa Balamban nga di na kinahanglan pang motadlas sa trapik kaayong Banilad-Talamban road. Lahoslahos ang imong dagan padulong sa Ayala Heights agi sa Barangay Sirao (kana kon naayo na ang karsada) diin ka magsugod pagtadlas sa Transcentral Highway.
Kon ikaw tig mountain bike, lahi ra ang environment kay seguradong presko ang hangin nga imong mahanggap kay maihap ra ang mga sakyanan nga mangagi.
Determinasyon
Duha ka tuig na kong wa makaduaw sa Barangay Guba nga nagbiseklita. Nakaagi man tuod ko, pero nag-scooter mi sa akong kamanghurang anak kay giimbetar mi og birthday sa kauban namo sa Barangay Paril.
Wa kaayoy kausaban nga akong nakita sa agianan, gawas sa sementado nang karsada nga hamis na sa pagtungas. Nakuhaan na hinuon ang kalingaw sa pagsikad tungod kay kaniadto, dunay mga portion sa karsada nga technical tungod sa rain ruts ug mga bato. Apan sa gihapon, medyo kuyaw ang magpataka sa pagdulhog labina kon ratulon. Dunay mga bahin sa karsada nga dunay mga graba nga kuyaw ma slide ang biseklita kon mokurbada.
Bisan medyo bug-at sa akong paminaw, akong gilahos ang Guba kay makaya ra og hangos, apan maora nag moligti ang akong mga tuhod. Nahurot gud nako paggamit ang sprocket. Lahi ra kaniadto nga kaya ra nako nga mogamit sa mid-ring ug kutob ra sa ikatulo o ikaupat nga sprocket ang akong pagkambyada.
Tungod sa akong determinasyon, bisan kon kaundangon, ako rang nakaya ang pag-abot sa Guba nga kaniadto, maabtan mig alas 9 sa buntag sa pagsikad kay magsige og pahuway.
Dunay kuyog
Nag-inusara ra ko sa pagtungas kay mao pa lagi pagbalik og sikad. Maikog pa kong mobalik sa pagtindak kauban sa akong mga higala kay gawas nga paspas na kaayo sila, lagyo na kaayo ang biyahe. Maikog kong makalangay sa ilang pagsikad, labina kay daghan kanila nangandam sa Cordillera Challenge sa Mountain Province sa Luzon karong summer.
Alang nako, maanindot ang duna kay kuyog sa pagsikad, apan kinahanglan nga di ka makalangay sa grupo. Kay duna bayay uban nga magdali kay dunay giapas nga oras.kan. Mas lingaw ang mosikad nga dunay kuyog kay makalimot ka nga naglisod ka na og ginhawa.