ANG asawa ni Ronda Vice Mayor Jonnah John Ungab nitug-an nga may hulga sa kinabuhi nga nadawat ang iyang bana sayo sa buntag sa wala pa siya gibanhigan-patay niadtong Pebrero 19.
Samtang gawas sa iyang propesyon isip abogado, gusto sa igsuon ni Atty. Ungab nga si Jonald nga masusi sa mga awtoridad ang anggulo sa politika isip usa sa mga hinungdan sa pagpatay.
Emosyonal ang asawa nga si Pearl samtang nagbasa sa giandam nga statement atol sa gipatawag nga press conference sa pamilya kagahapon sa buntag.
Iyang gihulagway nga maayong tawo ang iyang bana, responsable nga padre de pamilya ug matinabangon nga manlalaban ug way pili sa iyang mga kliyente.
Gitug-an ni Pearl nga di siya tigkuyog kang Atty. Ungab kon motambong og hearing, apan naidtong buntag sa Pebrero 19, gihangyo siya sa iyang bana nga ubanan siya sa korte.
Sa maong adlaw, gipahigayon ang promulgation of judgment sa duha ka mga kaso nga giatubang sa self-confessed drug lord sa Kabisay-an nga si Kerwin Espinosa.
Di kini ang unang higayon nga nakauban og hearing si Pearl kay sa miaging tuig nakauban siya sa Senate hearing sa kaulohan, diin gipresentar si Kerwin.
Gitumbok ni Pearl nga niadtong buntaga, may hulga nga nadawat ang iyang bana, diin gipapili siya sa kinabuhi o iyang kliyente.
“That morning earlier, we received a threat. That text message whether he chooses his life or his client’s. He never hesitated to put his client in another vehicle and chose to ride with me,” naghilak nga nisugilon si Pearl.
Sa front seat naglingkod si Pearl dihang gipusil sa wa mailhing mamumuno si Atty. Ungab, kinsa maoy nagmaneho sa ilang sakyanan alas 11:50 sa buntag niadtong Pebrero 19.
Padung unta sila sa buhatan sa National Bureau of Investigation 7 aron pagpaniudto kauban si Espinosa.
Nahiubos si Pearl kay bisan sa kadaghan sa nakakita sa nahitabo kanila, way bisan usa nga nitabang kaniya aron unta nga matabang ang iyang bana.
Gisegehan lang hinuon sila og kuha og mga video ug hulagway.
Naabtan pa’g pasado alas 12 una kini na-pull out sa crime scene.
Giawhag sa pamilyang Ungab ang publiko, ilabi na kadtong mga nakasaksi sa krimen, sa pagtabang sa gihimo nga imbestigasyon sa kapulisan ug NBI.
Gani, bukas sila sa posibilidad nga mohatag og reward money sa makatudlo sa mga responsable.
Si Pearl nihangyo usab sa publiko nga di hukman ang iyang bana tungod sa pagtabang sa mga kliyente nga may kaso sa ilegal nga drugas.
Dunay unom ka mga anak silang Pearl ug Atty. Ungab nga nagpangidaron og 20, 16, 12, 9, 6 ug 2 anyos.
“Arrest the bad guy or else the bad guy will kill more people,” panawagan sa 6-anyos nga anak nga si Zee ngadto sa mga awtoridad.
Pulitika?
Ang inahan ni Atty. Ungab nga si Dr. Alma Ungab nihulagway sa pagpatay sa iyang anak nga “barbaric” ug nanawagan siyag hustisya alang niini.
Gawas sa iyang propesyon pagka-abogado ug sa personal nga motibo, buot sa pamilya nga masusi usab og maayo sa mga awtoridad ang anggulo sa pulitika.
Matod sa igsuon ni Atty. Ungab nga si Jonald, dunay nag-ung-ong nga suspensiyon batok sa kasamtangang mayor sa Ronda nga si Mariano Blanco.
Kini subay sa giingong 15 counts sa kasong kalapasan sa Anti Graft and corrupt Practices Act.
Kon mapatuman kini, hayan nga ang iyang igsuon maoy mopuli sa posisyon.
Silang Mayor Blanco ug Atty. Ungab runningmate sa eleksiyon niadtong 2016 ubos Liberal Party samtang si Jonald nagpapili pagka-mayor atbang ni Blanco.
Hugot nga gisalikway ni Blanco ang spekulasyon nga may kalambigitan siya sa kamatayon sa iyang pag-umangkon.
Matod niya, posibleng may personal lang nga kaligutgot si Jonald kaniya kay nag-atbang man sila sa miaging piniliay.
Dugang niya, wala ‘say nilusot nga suspension order batok kaniya subay sa bisan unsa nga kaso.
“Di man ko insecure parte og pulitika. This is my last term. Nganong ako may pasanginlan nila? Kana si Attorney (Ungab), pinangga kaayo ko na. Ako’y ga-build up niya para sa iyang politika. Ngano kami man gyuy pasanginlan?” niingon ang mayor.
Wa malambigit
Sa laing bahin, nanalipod si Jonald sa iyang igsuon labot sa pamahayag ni Chief Insp. Jovie Espenido nga “partner” ni Kerwin sa negosyo si Atty. Ungab ug dili lang kini basta iyang abogado.
Apan matod ni Jonald, hagbay rang gibasura sa Department of Justice ang kasong gisang-at ni Espenido batok sa iyang igsuon nga gipasanginlang apil sa drug trade ni Espinosa.