SECTIONS
Wednesday , June 20, 2018

18 anyos 'gi-gang rape' sa 6 ka menor nga kainom

UNOM ka mga menor de edad nga parehong mga tinun-an sa Grade 11 sa usa ka pribadong tunghaan sa dakbayan sa Mandaue gireklamong mi-gang-rape sa ilang kainom nga 18 anyos nga babaye.

Upat kanila 16 anyos ug ang duha, 17 anyos.

Ang babaye usa sab ka high school student sa pampublikong tunghaan sa dakbayan.

Matod ni Chief InspectorWilbert Parilla, hepe sa Station 5 sa Mandaue City Police Office (MCPO), nga kini nahitabo sud sa apartment nga gisak-an sa tulo ka mga estudyante nga lumad sa Masbate.

Ang mga estudyante uban sa 21 anyos nga Ate niini, gikatahong nag-inom sud sa apartment sa mga menor de edad sa may Barangay Looc, Mandaue City.

Nagsugod alas 10 sa gabii niadtong Huwebes ug nahuman sa ilang tagay alas 4 sa kadlawon kagahapon. Nakahurot sila og duha ka botelya nga brandy.

Atol ning pagsuwat, ang Women and Children Protection Desk (WCPD) sa Mandaue City Police Office Station 5 naghuwat na lang sa resulta sa pagpahiling sa babaye sa pink room sa Vicente Sotto Memorial Medical Center kon positibo kining nahilabtan sa mga menor.

Matod ni Parilla sa Superbalita Cebu, ang Ate sa babaye nakasakop sa gibuhat sa mga batan-ong lalake ngadto sa iyang manghod pasado alas 4 sa kadlawon.

“Nakabantay siya nga magpulipuli og saka-kanaug mao to iyang gisaka. Naabtan niya ang usa nga naa didto, diha na nisulti iyang manghod nga gihilabtan siya. Ang maguwang maoy nakasakop kay nakabantay siya nga nagpulipuli og saka sa kainom mao to nitawag siya og pulis,” matod ni Parilla.

Ang grupo nag-inom sa sala ug giingong nahitabo ang “rape” sa lawak sa taas sa apartment.

Nagkainom ang grupo human si Noel (di tinuod nga pangan), 17 anyos, ni-post sa Facebook nga magtagay ang grupo.

Si Noel niingon nga ni-chat kanila ang Ate sa babaye nga ex-girlfriend sa iyang amigo nga moapil sa inom.

Sigun niya nga nagka-jam na sila niadto sa Ate ni Jean (di tinuod ngan sa babaye) tungod kay kanhi uyab ang Ate sa iyang amigo ug nakabisita na sab sa ilaha.

Nihimakak

Kusganong gihimakak sa mga batan-ong lalake nga nahilabtan nila si Jean.

Duha kanila niingon nga igo lang sila nihikap kang Jean, ang laing duha wa nitingog samtang si Noel nagkanayon nga siya ug usa niya ka kauban wa nihilabot tungod kay naa ra sila sa sala uban sa Ate nga nag-inom.

“Duha mi kabuok nga wa nikuan, ako ra man tigtagay ato. Gawas nasad ko kay mopalit kon mahurot. Silbi, naa ra mis ubos, kuyog ra mi sa iyang Ate,” ni Noel ning mantalaan.

Sumala pa ni Noel nga igo lang niya gi-agak si Jean sa kwarto aron makatug tungod kay nakainom kini.

“Then ninaug kog balik, ninaug man sad siyag balik. Then wa man nako hilabti, nibalik og naug,” ni Noel.

Mapasakaan og kaso

Sumala ni Parilla nga bisan menor pa ang mga lalake apan mahimo na kining makasuhan.

“Kon makita nato sa atong imbestigador ug base sa resulta sa pink room, mo-file ta, it can be rape, although minor sila pero they are over 15 years old, so duna na silay criminal liability,” pasabot ni Parilla ning mantalaan.

Gitataw hinuon niya nga depende na sa huwes kon papiyansahon niini ang mga batan-on o ipaubos sa rehabilitasyon.

“It might be i-house ni sila sa rehabilitation, pending, kon naa silay abogado, maka-process dayon sa suspended sentence,” ni Parilla.

Ang mga menor nga lalake gikostodiya una sa Station 5 sa MCPO.


VIEW COMMENTS