NIADTONG Dominggo ang ikaunom nakong sikad sukad ko mibalik sa mountain biking. Nalipay ko kay akong gikakita ang akong tulo ka mga amigo, sila si Ivin Du. Ramon Villamor ug Jobany Tudtud. Nadungan nako si Ivin pagtungas sa Pulangbato padung sa Barangay Guba. Samtang sila si Ramon ug Jobany akong nasugatan samtang nagpadulong ko sa Barangay Mabini. Ila diay ko nga gibagat.
Nalipay ko kay dugay na ming wa magkauban og sikad. Di pa ko makasabay nila tungod kay gawas nga mas paspas sila itandi nako, lagyo ang ilang mga biyahe. Di nako kaya nga mosabay.
Nalingaw ko sa pag-abot sa Guba tungod sa kadaghan sa mountain bikers nga among nakadungan og kaon. Nahabilin ko sa tindahan kay nipahuway pa ko alang sa Mabini samtang sila si Ivin nangadto sa Cambinocot diin sila manukad alang sa Lusaran.
Sa pagkatinuod lang, kon hinayhinay lang nga dagan, kaya pa nako mosikad og medyo layo. Apan prone ko sa bikog kon malab-anan ang akong pwersa. Mao nang kining akong pagbalik hinayhinay lang aron di makalitan ang akong lower muscles.
Good morning
Ang nakanindot sa kabukiran kay kasagaran sa mga tawo nga imong maagian mo-greet og good morning, apil na ang mga mountain biker. Bitaw, sa nagsugod pa ko, ako nang nabantayan nga ang mountain bikers kasagaran ganahan makig-estorya og sama nila, basta parte sa biseklita.
Sagad sa among topic parte sa bike parts, unsaon pag-upgrade, asa makapalit og barato ug maayo og klase nga parts ug uban pa. Bisan gud mao pay pag-ila-ila, maora nag dugay na kaayo nga managhigala.
Mao nang dako kaayo og ikatabang sa mga tawo nga stressful ang kinabuhi tungod sa trabaho ang mountain biking.
Mas ganahan ko sa amoa sa kabukiran sa Talamban. Daghan og kakahuyan ang maagian. Minos ang mga sakyanan nga four-wheel mangagi, labina sa dumptrucks.
Ang labing nindot? Makadungog ko sa tingog sa mga langgam nga magpahinumdom nako sa bata pa ko.
Uso
Bisan asa ko nagsikad, kadaghanan karon naggamit na og 29er ug 27.5. Mga gidak-on ni sa wheel set nga mas dako kay sa naandan kaniadto nga 26. Bisan sa akong mga higala, ila nang gamit ang 29 nga mountain bike.
Sagad sa akong feedback mas gahi sikaran ang 29 wheelset kon itandi sa 26. Bitaw, di man gyud na kahibudngan kay natural ra man na. Mao nang sagad ini single speed ug ang ring gamay samtang dagko ang likod alang sa mas humok nga pagtindak.
Akong suwayan kon okay ra ba ang 29er. Makaya kaha nako? Matubag ra ni kon akong masuwayan og tindak.