NASIKOP sa National Bureau of Investigation (NBI) 7 ang usa ka lalaki nga wanted sa kasong murder.
Nanghimakak hinuon kini sa mga alegasyon batok kaniya.
Pinasikad sa warrant of arrest nga giluwatan sa Lapu-lapu City RTC Branch 54, nasikop sa NBI kagahapon sa buntag sa brgy. Bangbang, lungsod sa Cordova si Andrew Heruela, akusado sa kasong murder.
Si Heruela gipasanginlan nga maoy nipatay sa silingan niini nga usa sab ka kanhi pulis nga si Eligio Mantilla Mayo sa miaging tuig, sa brgy. Babag, Lapu-lapu City.
Matod ni NBI 7 Director Patricio Bernales, duha ka semana pa na-isyu ang warrant of arrest batok sa akusado.
Hinuon wa sila nahago sa pagpangita niini kay wala man magtago-tago ug wa sab kini mosukol sa ilang pagpatuman sa arrest warrant.
Ang 32-anyos nga akusado nanghimakak hinuon sa alegasyon.
Nipadayag si Heruela og kaandam sa pag-atubang sa kaso nga gisang-at batok kaniya.
Matod niya, kahibalo siya nga silingan niya ang biktima apan wa gani siya direktang makaila niini ug dili siya makahimo sa pagpatay kaniya.
Nakurat lang siya nga gipadakop na siya sa korte kay duna pa unta siya’y nag-ung-ong nga petition for review ngadto sa Department of Justice.
Gawas niini, giingong duna sa’y duha ka saksi sa hitabo nga nibakwi sa ilang pamahayag batok kaniya.
Kasamtangan siyang gibalhog sa NBI 7 detention cell samtang wala pa mabalik ngadto sa sala ni Lapu-lapu RTC 54 Judge Ferdinand Collantes ang giluwatan niini nga warrant of arrest.