SAYO kong nimata kagahapon sa buntag. Mga alas 5:20 pa lang, nibangon na ko ug nangandam sa akong ikasiyam nga ride sukad ko nibalik sa mountain biking.
Akong gisuwayan kon makatungas na ba ko sa Barangay Mabini, bukirang dapit sa Cebu City. Ang tig-MTB nakahibawo na kon unsa kagrabe ang katungason ning lugara, apan kon gusto ka og igo nga hangos, kini ang lugar nga imong gipangita.
Niadtong Biyernes, nagsabot mi sa akong higala nga si Sr. Inspector Delfin Bontuyan nga manikad og sayo. Apan gikinahanglan man nga mosayo kog abot sa newsroom kay di kalikayan ang duka human sa ride nga maoy makaingon sa kalangay sa akong pag-report sa trabaho.
Wa pay alas 6 ug igo-igo pang nihayag, nagsikad na ko padung sa bukid. Ako na lang gipahibawo si Delfin nga nagdali ko ug di makakuyog nila. Didto sila namahaw sa Barangay Guba samtang ako igo rang niinom og Gatorade ug nipahuway og mga 15 minutos una pa nibalik pagdulhog.
Bentaha
Nagsugod ko sa mountain biking mga December 2009. Nisugod ko og saka sa bukid Abril 2010 human ko dad-a ni Embet Entice sa Barangay Guba agi sa Pulangbato. Sa hinayhinay nakong praktis, malahos na nako ang rota nga way pahuway human nako makuha ang akong ginhawa.
Kagahapon, nagtuo kong maputol ang akong sikad, pero sa hinayhinay nga tindak, naabot ra ko sa Mabini proper. Ang nakaayo lang kon dugay ka na sa mountain biking, kahibawo ka na sa kakusgon sa imong pagsikad nga di ka magkaproblema pag-abot sa destinasyon. Mao nay bentaha kon dugay ka nang nagsige og sikad.
Ikaduha to nako nga ride sa Niner. Di pa kaayo nako ma-feel ang deperensya sa 29 ug 26 sa pagtungas kay naggamit man ko sa 26 teeth pa nga ring. Apan sa dulhog, mas feel nako ang stability sa mas dako nga ligid kay sa gamay.
Magkadugay
Sagad sa bag-o pang mobiseklita o mag mountain bike, paspas kaayong mosikad sa pagtungas. Apan pag-abot sa unahan, mapawong na. Mopahuway na og tindak kay grabe ang hangos.
Unaha og build ang imong endurance sa ride. Ang kusog mosunod ra na kon maanad ug maka-adjust na ang imong lawas sa kalisod ug kabug-at sa tungas. Mahibung ka lang nga magkagamay ang sprocket nga imong gamiton sa pagtungas kay naanad na ang imong lawas, labina ang muscles nimo nga imong gigamit sa pagtindak.
Ang importante, imong ma build ang stamina ug endurance ride aron mas daghan kang lugar nga maadtoan. Mas enjoy ka sa imong ride.