DAGHAN ang nangalipay nga mga fans sa Cleveland Cavaliers sa dihang sa paghiabot sa bag-ong upat ka mga batan-on recruits, mipugnit gilayon kini og sunodsunod nga kadaugan.
Gituohan nga nakakita na og saktong kombinasyon ang Cavs sa presensiya nila ni Jordan Clarkson, Larry Nance Jr., George Hill ug Rodney Hood nga maoy solusyon sa nagkaguliyang nga Cavaliers.
Pero ning uwahing mga bahin nihinayhinay na man sab og kaawop ang ilang masidlakon nga kadasig.
Di kaha nga ang deperensiya niini mao ang ilang coach nga si Tyronn Lue?
Sa ako lang hamubong panahom, sakto na man sa piyesa ang Cavaliers pero naobserbahan nga weak man gihapon ang ilang depensa.
Mao ni usa sa mga reklamo ni LeBron James. Lab-as pa sa akong hunahuna sa usa ka interview, si James mipadayag nga wa siyay kasiguroan sa sitwasyon ni coach Lue kon magpabilin ba kini sa Cavaliers.
Kining maong pamahayag, nabuhian ni James niadtong nagsunodsunod ang ilang kapildihan.
Sa sinultian ni James, kinsa posibling ma-free agent na inig human ning nagpadayon nga season, masabot nga morag wa na siyay gusto ni Lue. Pero gidepensaan sa management si Lue ug gipasaligan nga magpabilin kini sa team.
Pero sa sitwasyon karon, dili kaha posibiling i-bargain ni James ang iyang kaugalingon ug iyang papili-on ang Cavaliers kon asa ang palabihon - siya ba o si Lue.
Laing anggulo mao nga posibli usab nga himuon kining rason ni James nga mobalhin siya og laing team ilabi na kay dunay pagpanghaylo kaniya ang Philadelphia Sixers. Kini pangagpas lang.
u25cf ● ●
Kon way kakuli-an posibling mopahigayon og courtesy call si International Boxing Federation (IBF) flyweight king Donnie “Ahas” Nietes ngadto ni Presidente Rodrigo Duterte karong semanahona.
Hinuon dila pa gyud ni kompirmado kay ang nag-arrange ang ABS-CBN man unya kahibawo na man ta nga dili maayo kaayog relasyon ang maong giant television network ngadto sa Presidente.
Gani nilarga kagahapon si Nietes paingon didto sa Kaulohan alang sa iyang pipila ka mga guesting diin molungtad pa og semana kapin ang iyang pag-istar sa Manila.
Duna usay gikatakdang courtesy call nga himuon si Nietes didto sa Mayor sa iyang yutang natawhan sa Murcia, Negros Occidental.
Sukad man gud sa iyang pag-uli dinhi sa Sugbo human sa iyang malampuson ug impresibong pagdepensa sa titulo didto sa America pinaagi sa pag-knockout sa Argentinea challenger nga si Juan Carlos Reveco sulod lang sa pito ka round wa pa gyud kauli si Nietes sa Murcia.
Niadtong Dominggo, ang Semblante ug Elizondo family nga mga suod sa longest reigning Filipino world champion, mipahigayon og simpli lang nga salo-salo o selebrasyon sa iyang kadaugan sa ilang harianong panimalay sa White Hills-Banawa.
Nahikuyog ta, ug dili usab nako bag-o kining mga pamilya, kay ako ra man sab ning mga higala ilabi ni kanhi Cebu City councilor Ernesto “Erning” Elizondo nga maoy permi nako ikakuyogkuyog
kaniadto. Kaduwa-duwa usab nako sa basketball ang iyang mga anak nga sila si Dodong ug Mark.
Ang apo ni Boss Erning nga si Marco, kumpare ni Donnie. Anak siya sa ato usab nga amigo nga si Mario Semblante.
Anyway, salamat Migong Mario sa inyong pag-abi-abi. (junmigs0622@yahoo.com)