SECTIONS
Monday , June 25, 2018

Editorial: Saludo sa mograduwar

NING ikaduhang semana sa Marso sagad pinal na ang listahan sa mga mograduwar sa ikaduhang semestral sa tuig tingtungha 2017-2018 alang sa tanang ang-ang sa edukasyon.

Nag-ung-ong ang daghang seremonyas sa graduwasyon labi na sa senior high school ug kolehiyo. Gipaabot nga sila mahimo nang kabahin sa sektor sa pamuo nga gilaumang motabang sa pagpatuyok sa ekonomiya.

Ang SuperBalita misaludo sa tanang motapos sa ilang pagtuon, mograduwar o dili pa.

Subay sa karaang panultion, ang edukasyon bulawang bahandi ug kabilin nga dili makawat ug magpabilin kanimo hangtud sa imong katapusang gutlo ning kalibutan.

Ang edukasyon, matud pa, yawe sa imong maayong kaugmaon. Ug dakong kalampusan ug garbo sa mga ginikanan o pamilya ang pagpaso sa usa ka tinun-an sa entablado aron pagdawat sa sertipiko sa propesyon. Apan dili tiaw ang kalisud nga nasinati sa batch sa mograduwar ning tuiga.

Sa senior high school, (gawas sa pilot areas) sila ang unang mograduwar human sa hingpit nga pagpatuman sa K-12 Program sa Department of Education (DepEd). Masuwayan ang ilang katakus sa panarbaho niadtong dili una molahos o walay plano nga molahos sa kolehiyo. Samtang, ang mograduwar sa kolehiyo, ang pagpangita og trabaho mao kanunay ang dakong hagit tungod sa dili balanse nga bul-og sa mograduwar ug bakante nga trabaho, labaw na nga ang oryentasyon sa mayoriya sa graduwado wala nakatutok diha sa pagmugna og trabaho o negusyo.

Mao nga nagkadaghan ang overseas Filipino workers (OFWs) diin dako og parte sa pagpatuyok sa ekonomiya sa nasud.

Sumala pa, ang graduwasyon sinugdanan lamang sa lain na usab nga ang-ang sa atong pagpakigbisog sa pagbugtaw sa maayong kaugmaon.
Kon ang imong pasensiya sa pagtungha, sumasanang pasensiya ang gikinahanglan sa imong pagtikang sa sektor sa pamuo o negusyante. Sa pagkakaron, saludo kami.


VIEW COMMENTS