SECTIONS
Tuesday , June 19, 2018

Nambatac: Damgo Ngadto sa Reyalidad

MAG-USA na katuig sukad minggawas ang resulta sa nasodnong piniliay ug giduyogan kas tawo sa pagsul-ot sa katungdanan ug responsibilidad isip Presidente sa Republika sa Pilipinas. Ang mga tawo, sa nagkalain-laing estado, nadalahig sa imong imahe isip usa ka matinud-anong pamuno sa usa ka nasod nga giurom sa problema sa kapobre, kalinaw, ug droga. Gusto sad nila makita ang ilang mga tagsa-tagsa ka mga syudad ug probinsya mahisusama sa Davao; kanhing lugar diin galungga ang nagkadinaiyang hugaw sa komunidad ug napatul-id gamit ang puthawng pagdumala. Tuod man, milambo ang syudad sa Davao.

Misuporta sad kanimo ang atong kaigsoonan nga naa sa ideolohiyang iya sa tuo tungod sa imong maayong relasyon sa Davao diin gitugotan nimong magpakabuhi sa kalinaw ang mga New People’s Army (NPA) diin ikaw pay moabri sa ganghaan sa gidumalaan nimong dakbayan para nila ug sa ilang mga kalihokan. Morag naibtag mga tunok ang mga tawo hilabi na sa mga komunidad nga naapektohan sa militarisasyon sa mga bukid tungod sa padayong opensiba batok sa mga NPA (MILF ug MNLF) tungod sa dayag nga pagpakita sa imong pagka-”sosyalista”, sa imong pagtahod sa kanhi mong propesor, si Jose Ma. Sison, ug sa paghatag sa mga sensitibong posisyon sa gabinete alang sa kaubanan sa CPP-NDF. Nakaingon ko sa akong kaugalingon: mahatagan nag katuldokan ug kasolbaran ang kapin tunga na nga dekadang pakigbisog sa mga tawong gidaogdaog sa katilingban, ug magdeklarag usa ka rebolusyonaryong gobyerno layo sa burokrata-kapitalismong-puydal nga sistema sa katilingban. Malipayong adlaw kini alang sa among mga kabus ug gipanghikawan sa nasod.

Kon unsa pagsadya sa tawo sa pagbutang nimo sa mga aktibistang kaubanan sa NDF sa gabinete, mao sad ang among pagkasubo sa imong paghatag og oportunidad nga makapanukad og balik sa katungdanan sa mga karaang pamilyang pulitikal diha sa Malacanang: ang mga Marcos. Wala mi nasayod kon unsa man gani nang imong gisulod nga panagsabot sa mga Marcos ug sa ubang mga politikog mga negosyante para sa asa mang rason, unta dili na mahimong babag alang sa paghatag kanamo sa imong saad. Oo, usa pa katuig ang minglabaw ug wala pa sad mi nawad-an og paglaom sa paghatag nimo sa mga butang nga gibalewala sa kanhing mga adminstrasyon hilabi na sa Mindanao pero mohangyo lang unta mi nga kon mahimo dili ka mokunhod sa sistema sa politika nga migunob ning atong nasod. Kabalo ko kon unsa na ka ka beteran sa pamulitika ug ikaw may mas nakasabot sa dagan ug daynamiko niining maong lawak sa katilingban, pero unahan sa nato ang interes sa mga tawo ug dili lamang sa mga pipila.

Mingpuyo kas pulo sa Mindanao halos sa kinatikbuk-an sa imong kinabuhi maong sa tanang Presidenteng milabay, ikaw maoy mas nakasabot sa kahimtang diri. Usa lang: bag-o mahuman ang imong termino unta mahatagan nagtubag nag problemangg gisagubang sa mga lumad tungod sa militarisayon sa ilang mga komunidad, mga maka-masang programang gipangayo sa CPP-NPA-NDF mahatag na unta (land reform, etc), ug ang pagputol sa privatization.


VIEW COMMENTS