SECTIONS
Tuesday , June 19, 2018

Barrita: Panginabuhi nga hanap

DUNAY usa ka construction wor­ker nga nipauli sa ilang baryo kay nahu­­­nong ang ilang proyekto dinhi sa syudad. Gipangumusta siya sa iyang amigo sa pag-ingon, “Pre, kumustang hanapbuhay?” Tubag pa niya, “Hanapbuhay? Buhay pa, pero hanap.”

Mao kana ang mahitabo sa mga trabahante sa usa ka construction site sa Archbishop Reyes Avenue ning syidad sa Sugbo human suspensoha sa kagamhanan sa syudad ang ilang proyekto.

Ang hinungdan mao ang pagkahugno sa ilang upat ka andana nga bunkhouse niadtong Martes sa kaadlawon nga mikalas sa kinabuhi sa lima ka mga construction workers ug nakaangol sa pipila nila ka mga kaubanan.

● ● ●

Mitumaw karon ang pangutana kon unsa kasubsob ang inspection sa mga opisyales sa Office of the Building Official (OBO) sa syudad sa Sugbo ingon man sa Departmen of Labor and Employment (Dole) kon luwas ba ang mga construction sites, lakip na sa mga bunkhouses nga gipuy-an sa mga trabahador.

Ang sagad natong madunggan mao nga kon dunay gitukod nga edepisyo dinhi sa syudad nga mahugno, diha pa molihok ang OBO ug ang Dole unya suspensuhon dayon ang maong proyekto kay susihon kon nakatuman ba sa safety standards ug sa National Building Code.

Ang maproblema intawon mao ang mga trabahante. Labi pa gyud intawon kadtong pamilya sa nangamatay sa pagkahugno sa ilang gipuy-an nga bunkhouse nga karon pa nila mahibaw-i nga wa diay makakuhag building permit.

● ● ●

Apan dunay sayon ug simple kaayo nga solusyon si Cebu City Mayor Tomas Osmena. Matod pa niya peligro kaayo ang mga bunkhouse sa mga construction workers. Busa, aron way bunkhouse nga mahugno, matod pa niya, idili ang pagtukod og bunkhouse dinhi sa syudad. Pagka-simple ra diay sa solusyon.

“Why should we allow bunkhouses here in the city? It’s a real danger. This is not the first time it happened,” matod pa ni Osmeña.

Nganong karon pa man siya makahunahuna niini? Kadaghan na man diay kini mahitabo. Kon sa pagsugod sa iyang termino iya pa dayon nga gi-ban ang pagtukod og bunkhouse, wa unta mahitabo ang nahitabo niadtong Martes sa kaadlawon.


VIEW COMMENTS