SECTIONS
Monday , June 18, 2018

Editoryal: Di solusyon

DUNAY plano si Cebu City Mayor Tomas Osmena nga ipa-ban ang mga bunkhouse alang sa mga construction worker. Nahuna-hunaan ni niya human mahugno ang usa ka bunkhouse nga gikatulgan sa kapin sa 150 ka mga trabahante.

Ang hitabo nikalas og lima ka mga kinabuhi ug niangol sa laing 55.

Matod ni Osmeña nga ang bunkhouse usa sa mga hinungdan nganong nanaghan ang mga taga laing dapit nga nanganhi sa siyudad kay duna na man silay kapuy-ang temporaryo.

Naandan nang gihimo sa mga kontraktor ang pagbutang og bunkhouse matag proyekto nila aron maoy kapuy-an sa mga trabahante.

Apan wa sa bunkhouse ang problema. Ang suliran hayan nagagumikan sa pagpasagad ug pagpabaya sa tawo og mga tawo nga gitugyanan sa pagtukod niini.

Hayan duna say pagpabaya ang Office of the Building Official (OBO) sa mao nga hitabo. Gisusi kaha sa OBO ang kalig-on sa damba nga gigamit, kana kon nakakuha og permit ang contractor.

Kon way permit, bugtong basulon lang ba ang contractor? Di ba trabaho usab sa gobyerno ang pagseguro nga ang tanang estrukturang gitukod dunay permit. Siyaro, way taga OBO nga nakabantay niini?

Samtang di kini hinungdan sa urban migration kun pagpamalhin dinhi sa mga taga lungsod. Kadaghanan sa mga trabahante dinhi mopadala sa ilang kita ngadto sa tagsa ka pamilya nga nahabilin.

Ang kasagaran sa namalhin kadtong nag-ilaid na sa tumang kakabus.

Ang solusyon sa suliran mao ang hugot nga pagpatuman sa balaud, pinaagi sa pagsusi kon nakatuman ug nakapasar ba ang estruktura sa mga rekisitos alang sa kaluwan sa mga trabahante ug ang kanunay nga pagbantay nga way makalusot ug way kamot nga mokangkang kon tunulan na og kwarta.


VIEW COMMENTS