SECTIONS
Tuesday , June 19, 2018

Super Suroy: Ang atraksyon sa Luyang

KINSAY nagtuo nga ang usa ka lugar alang sa iyang pamilya karon nahimo nang usa ka sikat nga kalingawan ug kapahuwayan sa lungsod sa Carmen?

Kini ang Marick Beach Resort nga nahimutang sa dan Ban­tigue, Luyang nga maoy ika­walong barangay sa lungsod nga nag-ubay sa kadagatan.

Si Marbeth Semprun, 62, nga lumad sa Barangay Sambag 1 ug Patrick Foley usa ka retired police officer ug contractor didto sa New Zealand nihukom nga sa Sugbo sila mamuyo human sa iyang 34 ka tuig nga panarbaho sa langyaw nga nasod.

Niadto lang Pebrero sa niaging tuig nasugdan ang katukoran sa ilang giplano nga pinuy-anan nga daw ang palibot sama sa usa ka lugar nga bakasyonanan.

Ginganlan og Marick ang resort nga gikuha sa ilang duha ka pangan nga Marbeth-Patrick adunay maanindot nga swimming pool alang sa dagko ug mga bata.

Adunay tulo ka deluxe rooms, family room ug mga barkada rooms nga nagkantidad og P1,500 ngadto sa P3,500 ug aduna sad silay restaurant bar, function room ug daghan pang uban.

Ang Marick Beach Resort haom sad sa birthday celebration, bunyag o reception sa kasal, team building ug ubang matang sa okasyon diin ang mga dagko adunay entrance fee nga P100, P50 sa tres hangtod 10 anyos.

Ang checked-in guests mo­bayad lang sa room rate ug libre na sila sa entrance fee uban sa lamian nga pamahaw diin ang check-in time sugod alas 2:00 sa hapon ug mogawas alas 12 sa udto.

Aduna sab silay tulo ka payag nga mosud og 15 ka tawo nga mobalor lang og P1,000 diin makita ang lapad nga kadagatan sa Luyang.

Nagplano usab si Marbeth nga mobutang og floating cottage sanglit gawas sa iyang resort anaa usab ang dagat.

Alang sa mga tawo nga gustong mopahimus sa kaanyag sa lugar, mahimo kamo sa reservation gikan alas 9 sa buntag hangtod alas 5 sa hapon ug pwede nga usab silang mabisita sa ilang Facebook page nga Marick Beach Resort.

Matod ni Marbeth kinsa ma­oy personal nga nagdumala sa resort nga modawat sila og walk-ins gikan sa adlaw nga Lunes hangtod Biyernes apan sa weekend ipaagi na nila og reservation ug first come first serve basis.

Sapagkakaron, ang Marick wa pa makabuylo sa ilang operasyon sanglit adunay ginagmay nga construction sama sa finishing touches sa ilang bag-o nga building ug landscape. Ang formal opening ipahigayon sa Abril 28 sunod buwan.


VIEW COMMENTS