SECTIONS
Monday , June 25, 2018

Boxing sa Bogo City buhion: Martinez

ANG pagbuhi og balik sa boxing maoy tumong ug tuyo sa dakbayan sa Bogo niining ilang paghost sa World Boxing Organization (WBO) Asia Pacific Youth Jr. Lightweight championship nga ipahigayon karong Abril 7 diha sa Don Celestino Martinez Sr. Sports and Cultural Center.

Kini maoy gibutyag ni kanhi Bogo City Mayor Celestino “Junnie” Martinez atol sa press conference kagahapon nga gipahigayon diha sa Rajah Hotel sa Fuente Circle, siyudad sa Sugbo.

“Actually, taodtaod na nga wa gyud ta ka host og professional boxing. We have a some potential boxers. Pero na-discourage man gud ta kay sa una gud, mokalit lang og ligid ang kontra. Bisag wa maigo matinga ta nga motalikod man. So boo-han ta sa mga tawo. Mao nga wa na gyud ta ma-enganyo,” matod ni Martinez.

“Pag-istorya namo ni Bebot Elorde, ako gyud siyang giing­nan nga Bot, kon bati ang away madaot ka, madaot sab inyong pangan diri. Kinahanglan nindot aron malingaw ang mga tawo,” dugang ni Martinez.

Sa maong card depensaan sa Sugboanong World Boxing Organization (WBO) Asia Pacific Youth super featherweight champion Joe “Jaw Breaker” Noynay nga taga Bogo, ang iyang titulo batok sa Mexican challenger Hector “Guadana” Garcia (12-6-2, 7KOs).

Kini ubos sa Elorde Interna­tional Promotions nga iya ni Gabriel “Bebot” Elorde Jr., a­­nak sa kanhi Filipino boxing legend Gabriel “Flash” Elorde lumad usab nga taga Bogo City.

Ang 22-anyos nga Noynay (13-2-1, 4KOs) , niadtong Disyembre milangkat sa WBO Asia Pacific Youth title human niya paundanga ang kanhi wala pay pildi nga si Pan Jinxiang didto sa Zhongsha, China sa ikawalo ka round.

Mitambong usab si Bogo City Councilor Noel Seno, chairman sa committee on sports ug si Atty. Ramil Abing, executiver director sa Cebu Province Sports Commission (CPSC) kinsa nagkanayo nga kini agig pagsuporta usab sa mga sports activities sa probinsiya.

Ang Kapitolyo mihatag og boxing ring sa Bogo nga maoy gamiton sa maong away.

“We are definitely supporting sports program in the different localities. Kon unsay atong matabang, di ta magpanuko pagdunol niini. Supportive man sab kaayo ang atong gobernador (Gov. Hilario Davide III),” matod ni Abing.

Gikatakda nga moabot ang Mexican dinhi sa Sugbo ka­rong Abril 4.

Ang chairman sa Games and Amusement Board (GAB) nga si Baham Mitra mosaksi usab sa maong away. (JBM)


VIEW COMMENTS