SECTIONS
Tuesday , June 19, 2018

James, Cavs nakabawos

MIPAKATAP og 39 puntos si LeBron James, lakip na niini ang siyam sa hinapos nga bahin, ug midugang pag 10 ka assists aron giyahan ang Cleveland Cavaliers nga mabawsan ang Denver Nuggets, 113-108, kagahapon sa National Basketball Associa­tion (NBA).

Naka­hi­mo pa og off ba­lance shot si James sa hi­­matyong se­­gun­dos nga maoy nagpakgang sa rally sa Nuggets kinsa sa unang higayon naka­­labaw sa na­­habiling 8:35 pinaagi sa layup ni Mason Plumlee.

Apan ang tres ni Jeff Green ma­oy naghatag sa Cavaliers og balik sa bintaha samtang laing three-pointer ni James sa katapusang 1:11 segundos maoy kompletong mihaw-as sa Cleveland gikan sa mahudlatong rally sa Nuggets.

Kuwang na lang og duha ka rebounds si James aron kini maka triple-double na usab ug ang kadaugan maoy nag-abli sa sunod nga unom ka duwa sa Cavaliers gawas sa ilang korte.

Kadto maoy ikaduhang sunodsunod nga pildi sa Nuggets kinsa napukan usab sa Dallas niadtong Martes nga nakaapekto sa ilang tinguha nga makasulod sa playoffs.

Sa makausap pa, si Larry Nance Jr. kinsa maoy miakupar sa luna nga gihaw-angan nila ni Kevin Love ug Tristan Thompson tungod sa injuries, nagpakita og saktong labok nga may 13 puntos ug 13 ka reobunds.

Nakapainit ni James sa maong duwa mao ang ilang kapildihan sa Nuggets, 126-117, niadtong Sabado nga did­to mismo mahitabo sa i­­lang korte.

Samtang gibingat sa Houston Rockets ngadto sa ika-17 ang sunodsunod nilang kadaugan, ug ning higayona, ang Milwaukee Bucks maoy ilang gibiktima 110-99.

Sa naandan, ang ilang su­perstar nga si James Har­den ang migiya sa way pu­tol­putol nga kadaugan pi­naagi sa iyang 26 puntos sam­tang midugang og 18 si Eric Gordon, lakip na ang du­ha ka tres nga maoy nagduslit sa rally third quarter.

Sa kadaugan, naapsan sa Rockets ang nahimo sa Boston Celtics nga pinakataas nga sunodsunod nga kadaugan sa karon nga season. Sukad niadtong Enero 26, ang Houston wala na gyud makatilaw pa og kapildihan.

Ang Utah Jazz, mipakura­tsa sa Indiana Pacers, 104-84, gipalyar usab sa Toronto Raptors ang Detroit Pistons, 121-119, gilupig sa Memphis Grizzlies sa pinaakay ang Chicago Bulls, gibaraw sa Los Angeles Lakers ang Magic sa Orlando, 108-107, ug gituhik sa New Orleans Pelicans ang Sacramento Kings, 114-101. (JBM)


VIEW COMMENTS