SECTIONS
Tuesday , June 19, 2018

Kainit sa Metro Cebu grabe; ‘pamandong’

MIPAHIMANGNO ang Philippine Atmospheric, Geophysical and Astronomical Services Administration sa publiko nga likayan ang mabuwad sa kainit sa ad­­l­aw nga mosobra sa 20 mi­nutos kay mosangko kini sa heat stress o heat stroke.

Si Engr. Al Quiblat, pangu sa Pagasa Cebu, niingon nga wala pa sila modeklarar og summer sa nasod, apan moabot na sa 39 degrees Celsius ang heat index o kainit sa lawas sa tawo karong panahona.

Kini nga kainit sa lawas mahisama kini sa tawo nga gihilantan nga delikado nga ma-convulsion kon sobra na ang kainit.

Sa pagkutlo ning balita, natala sa Pagasa Cebu ang temperatura sa 33 degrees Celsius, 1:49 kagahapon s hapon sa ilang estasyonan sa Mactan, siyudad sa Lapu-Lapu diin dunay mga presensiya sa mga kahoy.

Matod niya sa mga dapit nga daghan ang building, sementado ug aspaltado ang mga karsada sama sa siyudad sa Sugbo, dugang 2 ngadto sa 3 degrees Celsius sa ilang natala nga temperatura ang nasinati sa mga tawo.

Si Quiblat niawhag sa publiko nga kon way importante nga lakaw, likayan ang paggawas sa balay sa mga oras gikan sa ala 1 sa hapon hangtod alas 3 sa hapon ug mabuwad sa direktang kainit sa adlaw nga mosobra sa 20 minutos.

Siya nipasabot nga dunay criteria nga gitamdan ang ilang buhatan sa pagdeklarar og summer sama sa moundang na ang amihan diin maestablisar na sa Luzon ang gitawag og Ridge of North Pacific High Pressure o ang high pressure area sa taas sa Pacific Ocean.

Laing mga criteria ang hangin nga amihanang silangan mausab ngadto sa pagka easterly o south easterly ug mamatikdan sa Pagasa nga nagkasaka ang temperatura sa mga estasyonan nga gibutang sa nagkadaiyang lugar sa Pilipinas. (SCG)


VIEW COMMENTS