SECTIONS
Friday , June 22, 2018

Towing ug clamping ipatuman sa Minglanilla

SILOTAN ug pamultahon ang mga motorista nga illegal ug magpasagad og park sa mga sakyanan sa national highway ug tow-away zones sa lungsod sa Minglanilla sa higayon mapalabang na ang duha ka ordinansahon nga magtugot sa mga enforcer sa pagpatuman sa clamping ug towing.

Way nisupak sa duha ka ordinansahon, apan may pipila nga nisugyot sa dili pa i-clamp ug i-tow ang mga sakyanan, traysikol ug motorsiklo, atol sa gipahigayon nga hiniusang public hearing sa committees on laws and ordinance ug peace order sa Sangguniang Bayan kagahapon sa complex oval sa Minglanilla Central School.

Wa kaabot og 50 ka mga tawo gikan sa lainlaing sektor ang nitambong sa kalihokan nga kasagaran mga drayber diin gipasabot sila sa mga unod sa mga ordinansahon ug gihatagan usab sila og higayon nga makapadangat sa ilang mga kabalaka ug sugyot.

Sa Ordinance No. 13, ang sakyanan nga iparada sa mga dapit nga gidili sa kagamhanan sa lungsod pinaagi sa Minglanilla Traffic Commission (Mitcom) kay i-clamp ug pabayron og administrative penalty nga P1,000 ang drayber pinaagi sa iisyu nga citation ticket.

Gisugyot sa drayber nga si Dodong ang 5 minutos nga allowance sa dili pa i-clamp ang sakyanan sa taga Mitcom o pulis nga tinugyanan sa Traffic.

Ang masakpan nga mang­hilabot o moguba sa clamp nga way pagtugot sa Mitcom kay hatagan og penalty ubos sa Revised Penal Code o base sa ordinansa sa lungsod.

Si Konsehal Jesus Velez, chairman sa chairman sa committee on laws and ordinances, nisugyot og usa ka oras nga lugway sa dili pa i-tow ang sakyanan.

Ang drayber o tag-iya ma­kalapas sa mga probisyon sa maong ordinansahon sa higayon makonbikto sa korte kay mahimong silotan sa pagkapriso nga dili moubos sa usa ka buwan o molapas sa unom ka buwan o pamultahon og dili molabaw sa P2,000 o molabaw sa P5,000 o mahimo ang duha ka silot ang ipatuman mag-agad sa desisyon sa korte.

Samtang ubos sa Ordinance No. 14, kon ang drayber o tag-iya kay makalapas niini sa higayon makonbikto sa korte kay mahimong mag-atubang og di mominos sa usa ka buwan o dili molabaw sa unom ka buwan nga pagkapriso o pamultahon og di moubos sa P2,000 o molabaw sa P5,000 o mag-agad sa hukom sa korte.

Ubos usab sa Ordinance No. 14, pasiunang 12 ka mga dapit sa Minglanilla ang ideklarar nga tow-away zones nga naglangkob sa Natalio Bacalso Avenue, Minglanilla provincial road paingon sa Tulay hangtod sa Vito, St. Cecilia paingon sa daan nga complex, Dolor Mini Mart hangtod sa Science High School ug barangay hall sa Ward I, duha ka eskina sa Tiber, Lower Lipata, Tungkil gikan sa eskina Pakigne padung sa Tubod, padung sa Upper Pakigne, duha ka eskina sa Calajoan, eskina Abuno, eskina Tungkop, eskina Tulay hangtod sa Pepsi Nazareth Tungkop ug Calajoan provincial ug municipal road. (SCG)


VIEW COMMENTS