SECTIONS
Thursday , June 21, 2018

P1.4M na ang kita sa Farmer's Market

MOABOT na og pito ka semana gikan gisugdan ang Farmer's Market sa hawanan sa kapitolyo ug nasuta nga mokabat na sa P1.4 milyon ang kinatibuk-an nga kita sa mga mamaligyaay nga nagikan sa Misamis Oriental.

Si Nicole Managbanag, kinsa provincial information officer, nibutyag sa SunStar SuperBalita nga nalipay si Misamis Oriental Governor Yevgeny Vincente Emano niining kalamboan tungod kay dugay na niining gipangandoy nga mahatagan kahigayon ang mga mag-uuma nga makapamaligya ug mahuptan ilang abot nga dili moagi sa mga middle man o mga komprador.

"Farmer pod baya na si Gov mao dako kaayo iyang kasing kasing sa mga mag uuma nga mapakita ug molambo ilang panginabuhian." Matud pa niini.

Nakita sab nga kusog ang kita sa Farmer's Market tungod kay sa matag adlaw’ng Biyernes, dako ang abot niini ug dili na maabtan og hapon gawas pa makapalit ang mga kunsumidor og barato ra kaayo nga mga palaliton.

"Gusto nako i-congratulate ang Provincial Agriculture Office sa pagpangulo ni Dr. Benjamin Resma ug sa iyang mga kauban sa kalamposan sa Farmer's Market." Kini tipik sa pahayag ni Emano kinsa mao nag inisyatiba niini nga kalihokan.

Gisugdan niadtong Enero 19, 2018 diin unang halin miabot ngadto sa P125,200.

Sa ika-duhang semana nga display niadtong Enero 26 mokabat sa P240,480.50 ang abot sa farmers market.

Bulan sa Pebrero niadtong petsa 2 ning tuig mokabat sa P212,617 ang halin sa kinatibuk-ang baligya; pagka Pebrero 9 adunay kita nga P231,840; Pebrero 16 mihalin og P177,904; Pebrero 23 mikita og P220,615.

Sa pagsugod sa bulan sa Marso niaging Biyernes lamang, ika-pitong semana sa farmer's market moabot ngadto sa P244,315 ang kita ug sa kinatibuk-an mokabat na sa P1,452,870.

Ugma’ng adlawa, laing hugna na usab sa Farmer's market diin gidapit ang katawhan sa lalawigan ug siyudad sa Cagayan de Oro nga magdalikyat aron makapalit og mga preskong lagutmon, ug matilawan ang uban pa nga mga pagkaon nga gama sa Misamisnon.

Dugang ni Managbanag nga matag Biyernes sab siya gatambay sa dapit kay daghan siya og mapalit nga barato ra kaayo ug mapasalubong sa iyang pamilya.


VIEW COMMENTS