SECTIONS
Wednesday , June 20, 2018

Bullying gipaningkamotan nga mahanaw

GIPANINGKAMOTAN sa kapulisan ilabi na sa Police Station 9 (PS9) sa Macasandig nga mawagtang ang kasong “bullying” ilabi na sa ilang area of responsibility.

Gibutyag ni Senior Police Officer (SPO) 3 Josephine Dais, chief sa Women and Children Protection Desk (WCPD) sa PS9 sa pakighinabi sa SunStar SuperBalita, nga padayon ang ilang paghatag og mga impormasiyon kalabot na niining bullying diin usa sa mga problema sa ilang area of responsibility (AOR) diin anaay daghan nga mga tunghaan.

“Naghatag gyud mi og information drive in every school para pud ma-aware pud ang students about ani nga law kaning anti-bullying law ug unsa pud ang mga penalties and sanctions sa school kung maka-violate sila ani, nagbilin pud dayon mi og contact number in case of emergency magreport dayon sila sa among office,” pahayag ni SPO3 Dais.

Gidugang pa niini nga ga-upgrade usab ang bullying karong panahona diin nangahimo na diha sa social media hinungdan nga gapahigayon usab kini sila og pagsusi sa mga internet café aron masuta kung aduna’y mga menor de edad nga anaa sa maong dapit panahon o oras sa tingtungha.

“Kung mag conduct mi’g interview, ang atong bullying karon ni deviate na siya sa cyber bullying naa na siya sa FB (Facebook), chatroom ana, mga social media, mao pud na nga mag upgrade man gyud ta og mga information drive sa ilaha kay sauna physical abuse ra inside sa school so naa na gyud sa social media”, dugang pa niini.

Giingong nagpapikit usab kini sila og mga City ordinance kalabot na sa pagdili sa mga estudyante o menor de edad sa panahon sa ting klase gikan alas 7 a.m. to 7 p.m. sulod sa mga internet café.

Gidugang pa nga kung aduna’y importanteng i-research sa internet, kinahanglan pa kini nga mangayo og clearance sa ilang tunghaan ug sa ginikanan.

Nagbutang usab kini sila og mga notice sa sa mga tindahan sa pagdili sa pagbaligya og sigarilyo ug mga ilimnong makahubog sa mga menor de edad lakip niini ang mag penalties sama sa pagdili pag renew ug paghatag og business permit kanila kung makasupak niini balaod.

Nasayran nga karong panahona dili lamang physical abuse sulod sa tunghaan gakahitabo ang bullying apan lakip na usab sa social media diin usa sa mga dakong problema karong panahona ilabi na sa mga menor de edad nga mga magtutungha.


VIEW COMMENTS