SECTIONS
Thursday , June 21, 2018

5,000 kababayen-an mipasibaw sa ilang mulo

NAGKADAIYANG isyu gikan sa panawagan ug mga programa sa kababayen-an ang gipasibaw ug gipakita ngadto sa komunidad isip paghandom sa International Women's Day (IWD) sa Davao City kagahapon.

Mokabat sa 5,000 ka mga kababayen-an ang mipartisipar sa parada gikan Freedom Park sa Roxas Avenue padung sa San Pedro Square.

Suma ni Lorna Mandin, head sa Integrated Gender and Development Division (IGDD) sa Davao City, nga nalipay sila gumikan daghan ang misalmot sa ilang parada.

"This means that we are gaining more support in the community level, it is a positive development," ingon ni Mandin sa pakighinabi sa mga tigbalita.

Nagkadaiyang sektor sa kababayen-an gikan sa mga Non-Government Organizations (NGOs), mga buhatan sa gobyerno ug sa lokal nga kagamhanan ning siyudad ang misalmot dala sa panawagan ang tiunay nga pagrespeto sa ilang katungod ug ang pag-amoma sa ilang mga programa.

Uban sa temang "We Make Change, Work For Women" mas nadasig ang kababayen-an sa paghimo og mga butang sa palibot alang sa kabag-ohan di lamang sa ilang kaugalingon ug pamuyo apan lakip na sa komunidad.

Gipanawagan sab sa kababayen-an nga mas mapalambo pa ang ilang mga organisasyon aron maoy makapanalipod ug maghatag og kusog sa ilang papel sa katilingaban uban sa suporta sa gobyerno.


VIEW COMMENTS