SECTIONS
Thursday , June 21, 2018

Modus sa Manila, moabot sa Davao?

ARON di malutsan sa mga bag-ong modus operandi ang Davao Region, ang Police Regional Office (PRO) hugot nga nag-monitor labi na sa mga daghang tawo diha sa publiko.

Kini ang gibutyag ni PRO-Davao spokesperson Chief Inspector Milgrace Cajes Driz human misiaw sa Manila ang “Talakbu” [Taho, Lako, Bundol], usa ka modus operandi nga lisod madiskobre ang ilang mga lihok sa paghimo og krimen.

Suma ni Driz nga wala hinuon kini nga modus sa rehiyon apan ila na kining gipangandaman aron di kini makasulod labi na sa mga nag-unang mga siyudad sa rehiyon.

"Wala pa kini natala sa Davao Region but precaution lang kay sa uban lugar uso ni labi na sa Metro Manila basig mag-spill over o ma-replicate diri sa area sa region," ingon ni Driz.

Gidugang sa opisyal nga kinahanglan magmabinantayon ang katawhan ug gilayong mo-report sa pinakaduol nga police station sa ilang mga lugar.

"Dapat maging aware ta always basig naay mabiktima ani nga modus, tapos diha nata makamahay, so ang atong himuon, mo-report dayon ta sa mga nearest police stations," dugang ni Driz.

Sa miaging adlaw, miabot sa PRO-Davao ang usa ka memorandum gikan sa PNP higher office labot niini nga pahibalo.


VIEW COMMENTS