SECTIONS
Monday , June 18, 2018

Bayot sa Quiot gikulata, operahanan

ANAA karon sa Vicente Sotto Memorial Medical Center ang usa ka bayot human tabangi og kulata sa mga batan-ong lalake sa usa ka hilit nga dapit sa Upper Genes, Barangay Quiot sa syudad sa Sugbo Lunes sa kaadlawon.

Ang bayot giila ni Barangay Kapitan Francis Espares nga si Noel Radaza, hingkod, lumolupyo sa Barangay Quiot.

Matod ni Espares, nga alas 4:30 sa kaadlawon sa Lunes, may lima ka bayot gikan nga nag-inom ang nisaka sa Upper Genes aron mosuroy.

Duna silay nakit-an nga nagtapok nga mga batan-ong lalake nga nag-inom usab.

Gitawag ang mga bayot. Milanat og pipila ka gutlo, usa sa mga batan-on nga gihulagway nga nahubog na, mihingilin kanila.

Apan usa sa mga bayot ang misabat nganong palakwon man sila nga giimbitar man sila.

Nasuko ang usa sa mga lalake, nikuha kini og botelya sa ilimnong makahubog ug gilabay sa tiilan ni Radaza.

Tungod sa kahadlok, ang upat ka bayot nga kuyog ni Radaza, nanagan. Si Radaza nahabilin ug gitabangan og kulata.

Nihangyo pa si Radaza sa mga batan-on nga hunongon na ang pagkulata apan wa siya panumbalinga ug gisamotan og kulata ug dayon silang sibat.

Gibiyaan si Radaza nga nagkadugo na ang ulo ug lawas ug wa nay panimuot.

Ang mga nakakita nanawag sa barangay aron mahatod sa ambulansya si Radaza.

"Walay nakaila aning mga batan-on pero naa daw usa ani nga murag nailhan nga ato nga atung gipakuha karon aron maka guide sa atong kapulisan alang na sa imbestigasyon," matod ni Barangay Kapitan Esparis.

Gitakdang operahan si Radaza tungod sa kadaot nga nahiagoman niini sa lawas ug sa ulo.

Tungod sa nahitabo, miawhag si Esparis sa iyang mga lumolupyo sa iyang barangay nga likayan ang paglakaw sa hilit nga dapit panahon sa kaadlawon.

Dili lang diay kini ang unang higayon nga dunay ingon ani nga panghitabo sa maong dapit.

Ang maong lugar naila nga suroyanan sa mga lalake aron magpahangin ug didto usab mag-inom tungod kay naa kini sa ibabaw. (AYB)


VIEW COMMENTS