PARA pagpaluag sa dagan sa mga sakyanan hilabi na sa eskina dalan F. Llamas ug E. Sabellano, giablihan sa Shrine of Our lady of Lourdes Parish ang ilang compound.
Si Cebu City Councilor Dave Tumulak, kinsa maoy gitahasan ni Mayor Tomas Osmeña pagpangita og paagi, maoy nihangyo sa liderato sa parokya.
Iyang gipasalamatan si Father Randy Figuracion ug mga parokyano sa pag-uyon.
Si Tumulak nipahibawo nga kagahapon pormal nilang gisugdan ang pagpalagbas sa pribadong mga sakyanan, apan way labot ang mga motorsiklo ug ginadili usab ang paggamit sa busina sulod sa compound.
Matod sa konsehal nga sugod alas 6 hangtod alas 10 sa buntag, makaagi ang mga private car nga gikan sa E. Sabellano nga molapos sa F. Llamas paingon sa dalan Elorde (kanhi Ganciang), paingon sa ilang destinasyon.
Moabli og balik ang compound sa simbahan sugod alas 4 sa hapon hangtod alas 9 sa gabii diin ang gitugotan lang makaagi mao ang gikan sa F. Llamas paingon sa E. Sabellano largo sa ilang tagsatagsa ka rota.
Ang compound sa simbahan magamit sa mga motorista gikan sa Lunes hangtod sa Biyernes, apan di ang Sabado ug Dominggo kay okupado sa mga manimbahay.
Gipasabot sa konsehal nga panahon sa buntag, daghan ang mga sakyanan nga mopaingon sa kinapusoran sa siyudad gumikan sa trabaho ug sa hapon magpanon usab padung sa gawas sa Cebu City.
Ang City Government nangita pa og dugang mga paagi aron mapaluag ang dagan sa mga sakyanan sa south district.