SECTIONS
Monday , June 25, 2018

Pulis, 2 ka tawo gitipi

TULO ka mga tawo, usa niini pulis, gipamusil patay sa managlahing mga dapit sa Sugbo kagahapon.

Ang pulis giatangan sa lungsod sa Minglanilla sa mamumuno nga nagsakay og sports utility vehicle samtang ang duha ka gidudahang mga durugista gipamusil patay sab sa dakbayan sa Lapu-Lapu.

Ang pulis nga giingong absent without official leave (Awol) namatay sa mga samad pinusilan sa ambush kagahapon sa ala 1:45 sa hapon sa may Barangay Linao-Lipat, Minglanilla.

Ang biktima giilang si PO2 Romeo Santiago Bolaño, 49, kinsa nagmaneho sa iyang sakyanan samtang sakay kaniya ang usa ka bayot ug babayeng pulis nga nadestino sa Naga police station.

Si Bolaño, minyo, taga Barangay Lawaan 1, dakbayan sa Talisay, gibalhin sa Codillera Region, apan giingong ni-Awol.

Si Chief Inspector Vernino Noserale hepe sa Minglanilla Police Station nga nahinabi sa Superbalita Cebu niingon nga base sa pasiunang imbestigasyon, gikan sa Dakbayan sa Naga si Balaño, nagmaniho sa Toyota Corrola (YCJ 570) kolor puwa paingon sa dakbayan sa Talisay.

Iyang kuyog si SPO2 Maricor Aliganga, 38, nadestino sa Naga City Police ug ilang higala nga si Clifford Zamora, 42, taga dakbayan sa Naga.

Paghiabot sa lugar, nihunong kini sa Palawan Pawnshop kay nihapit si Aliganga.

Apan pipila lang ka sigundos gikan sa pagkanaug niya, nadungog na niya ang buto-buto sa armas ug iyang nakit-an si Bolaño nga nagkadugo sulod sa sakyanan.

Si Zamora samdan sab sa iyang wala nga bitiis.

Si Aliganga na ang nimaniho sa sakyanan paingon sa South General Hospital sa Naga apan gideklarar nga patay nang midangat sa tambalanan si Bolaño.

Gibana-bana ni Noserale nga naa sa upat ngadto sa unom ka mga samad ang nahiagoman ni Bolaño nga niigo sa wala nga ilukan.

Ang mga nirespondeng pulis wala’y nakuha nga kabhang sa mga bala hinungdan nga sila nagtuo nga .38 caliber revolver ang gamit.

Nagtuo si Noserale nga mas taas ang sakyanan nga gisakyan sa gunman tungod sa trajectory sa igo.

Ang mga saksi sa hitabo mibutyag nga usa ka SUV kolor green ang gisakyan sa mga kriminal nga igo lang misikit sa sakyanan ni Bolaño, niabli sa bintana dayog pusil.

Ang anggulo nga gitan-aw nila ni Noserale mao ang trabaho ni Bolaño, kon kini aduna ba’y nakuptan nga dagko nga kaso ingon man ang pagsubay sa assignment sa namatay, ilabi na kay nakadawat siyag report nga na-dismiss na kini kaniadto apan niapeler ug nabalik sa puwesto.

Gusto usab nilang makuhaan og pamahayag si Aliganga ug unsay ilang relasyon ug trasaksyon.

Kagahapon human sa hitabo, di pa nila maestoryahan si Aliganga sanglit na-shock pa.

2 gipatay

Duha ka mga tawo sunod nga gipatay sa dakbayan sa Lapu-Lapu sud lang sa kapin sa duha ka oras nga gintang kagahapon.

Usa sa mga biktima giilang si Paul Jonathan Gamali Ompad, 52, taga Sto. Niño Village, Barangay Basak.

Naukay ang mga residente sa Sangi New Road, barangay Pajo kagahapon sa mga 10:00 sa buntag sa dihang si Ompad natumba uban sa gimaneho nga motorsiklo human pusila.

Usa sa mga saksi nga wa magpa-ila nagkanayon nga unang naigo si Ompad sa buko-buko.

Sa iyang pagkatumba, giusban kini sa gunman og pusil sa ulo.

Unom ka mga basiyo sa bala ang nagpasad daplin sa lapukon nga karsada.

Sa wa pa mahitabo ang pagpamusil sa barangay Pajo, patay diha-diha ang 39 anyos nga construction worker nga si Jerome Igot,taga-Pusok Cemento, Barangay Pusok.

Base sa imbestigasyon ni P03 Joseph Cutanda, Homicide Section sa Lapu-Lapu City Police paingon na unta motambong sa iyang trabaho si Igot sa dihang gipusil sa iyang liog sa wa mailhing mamumuno.

Sigun sa mga nahipos nga inpormasyon gikan sa mga naka-ila sa duha ka mga biktima nalambigit sa illegal nga drugas.


VIEW COMMENTS