GITUG-ANAN ko ni Joy Tumulak nga nagsugod na ang ilang pagpangandam duha na ka semana ang nakalabay para sa Semana Santa. Si Joy nga maoy Operations Chief sa Cebu South Bus Terminal nagtambong ron ug usa ka semana nga training mahitungod sa trapiko didto sa University of the Philippines sa kaulohan akong nahinabi pinaagi sa telepono.
Matod niya sa nakalabay nga duha ka semana mga tinugyanan sa Land Transportation Office nihimo og pakisusi sa mga bus ug mini bus sulod sa terminal.
Ang ilang findings gisulat sa check lists ug mao ni ang sulbaron sa mga operator sa dili pa ang final inspection. Mahitabo ni sa dili pa magsugod pagbaha ang mga pasahero karong Semana Santa. Nindot ning panag alyansa sa taga terminal ug LTO kay para nako ang kaluwasan sa mga pasahero maoy pinaka importante sa tanan ilabi na sa mga okasyon sama sa Semana Santa.
Laing pagpangandam nga gihimo mao ang pagdugang og mga pulis ug Civil Security Unit kun CSU sa terminal.
Nasayran nako gikan sa sakop sa CSU nga si Moises Zosa ug P01 Myco Baclayon nga gawas sa mga kiriwan og kamot lakip nga ilang gibantayan mao ang mga pasahero nga nakainom ug maghasol sud sa terminal. Niingon si Zosa ug Baclayon nga diha’y higayon nga ilang gidakop ug gidala sa Station 5 ang hubog nga pasahero. Gawas nga hubog nagbinastos pa gyud ni atubangan sa ubang pasahero. Usa ni sa angay nga estriktohon sa pagpatuman kay lisod na kung adto sa sud sa bus magmaoy. Basin mangilog og manobela madisgrasya ug di oras ang mga pasahero. Busa kamong gustong moinom palihug unya’g abot nalang sa inyoha magtagay kay sa matanggong.
GT Express
Sa Cebu City GT Terminal nga nahimutang sa dalan Junquera, matod ni Douglas Labra kanunay silang igmat batok sa mga kiriwan. Si Labra nga nagrepresentar sa Federasyon sa mga driver nipahibawo nga duna silay subra sa 200 ka van nga mohakot panahon sa Semana Santa. Sama sa naandan ang unang makalukat og tiket maoy unang makasakay. Nag-andam na sab sila og mga payong nga magamit sa mga pasahero ingkaso maabtan og ulan samtang nagdung silang molukat og tiket o mosakay. Sagopon sab niya ang atong sugyot nga isakay ug wheelchair padung sa van ang mga masakiton, senior citizen ug mga bakol nga pasahero.