SA niaging Huwebes, akong gisanong ang pangagda ni Atty. Ramil Abing, executive director sa Cebu Province Sports Commission (CPSC), alang sa usa ka dinner uban ni kanhi PBA coach Boyet Fernandez ug sa iyang coaching staff diha sa Rumours Resto Bar sa Bonifacio District sa Panagdait.
Si Fernanadez, kanhi usab pointguard sa PBA ug karon headcoach sa NCAA back-to-back champion San Beda Red Lions maoy speaker sa tulo ka adlaw nga coaching seminar sa Mandaue City Cultural and Sports Complex nga nahuman niadtong Huwebes.
Uban usab namo niadtong gabhiona si kanhi USPF coach Albert Alocillo, usa sa mga facilitator, iyang asst. nga si Joph Cleopas, ug Brando Vasquez, ang pangabaga ni Atty. Abing.
Over bottles of beer, wa kalikayi ang hisgut-hisgot sa mga kaagi ni coach Boyet ilabi na niadtong player pa siya sa Sta. Lucia Realty ubos ni Nat Canson hangtod nga nahimo siyang coach sa NLEX Road Warriors.
Kadto gung Sta. Lucia maoy permi moanhi sa Sugbo alang sa mga exhibition games ug gani ang suki nga kontrahon ato mao ang M. Lhuillier Jewelers ug ang Sunpride Foodmasters.
Mao sab toy hinungdan nga daghan sab silang makuha nga mga Bisaya o Sugboanong players sama na lang nila ni Vidal Labrada, Montoy Singson, Jessie Baclayon, John Ferriols, Apet Jao, Max Delantes ug bisan gani kato si anghing Woodrow Enriquez maapil na unta sa ilang lineup apan kalit lang kining niuli.
Pero ang laing nasentro sa among diskusyon niadtong gabhiona mao ang kalit nga pagsulod sa NLEX sa semifinals sa nagpadayon nga Philippine Cup sa PBA.
Kini maoy unang higayon nga nakataak ang NLEX sa semis, butang nga wa mahitabo bisan sa panahon ni coach Boyet.
Giangkon ni coach Boyet nga batok sa Magnolia Hotshots, tawo-por-tawo ug experience wise, dihado gyud ang NLEX kay sagad nila mga batan-on man.
Pero hugot ang iyang pagtuo nga ang Road Warriors maoy mopatigbabaw sa series.
Ngano man? Matod ni coach Boyet “May ibang sistema si coach Yeng (Guiao). Basta may ibang trick siya. Hindi siya masyadong dependent sa talent nang mga players. Alam niya yun.”
Sa pagkatinuod lang minus ang akong pagtuo sa gisulti ni coach Boyet, pero niadtong Biyernes, coach Guiao pulled off the trick that levelled the series, 2-2.
Dinhi makaingon ko, dakong posibilidad nga mahitabo ang giingon ni coach Boyet, ug ang pivotal Game 5 karong gabii maoy usa sa sukaranan.
(junmigs0622@yahoo.com)