TUNGOD sa gipaabot nga pagdagsa sa daghang tawo sa Cebu South Bus Terminal (CSBT) atol sa tingsakay sa Semana Santa, hangyo sa tagdumala sa pasilidad nga mokaon daan ang mga pasahero sa dili pa molinya ug maghuwat og kasakyan.
Nagtuo si CSBT Operations Manager Joey Herrera nga sa ingon niini nga paagi, malikayan ang mga insidente sa pagkalipong o pag-collapse sa mga pasahero.
Matod ni Herrera, nga karon lang buwan, nitala ang terminal og upat ka mga tawo nga nakuyapan sa sulod sa ilang pasilidad samtang naghuwat og kasakyan.
Dugang niya nga tulo ngadto sa upat ang namahayag nga wala sila'y kaon sa wala pa niadto sa terminal.
Ang grabeng kainit sa panahon nakatampo sab sa bati nga kondisyon sa panglawas sa pipila ka mga pasahero busa sigun ni Herrera, importante nga nakakaon ang mga pasahero aron usab dili kini makuyapan ug malangay na hinuon sa ilang biyahe.
Gawas niini, angayang ikonsiderar usab sa mga pasahero ang posibleng traffic nga ilang maagian nga makaingon na hinuon sa pagkapasmo.
Sa Semana Santa, gipaabot sa CSBT nga anaa sa 40 mil ka mga pasahero ang modagsa sa terminal apan anaa lang sa 750 ang ma-accommodate o makalingkod diha sa waiting area sa terminal hinungdan nga magbarog na ang uban samtang maglinya.
Nunot niini, importante nga duna sila'y igong kusog aron dili makuyapan. Gitambagan sab sila pagdala og candies o kaha liniment oil nga mahimong simhuton o ihaplas aron dali nga maulian sa pagkalipong ug bati nga pamati og lawas.