NAGPLANO na ang uban ug outing para sa panahon sa ting bakasyon. Duna na’y daghang listahan sa mga dapit nga adtuon. Nag-una sa listahan ang mga baybayon nga sagad gi-post sa internet.
Di sab magpauwahi ang waterfalls ug mountain resorts. Duna sa’y nalista nga mga isla nga sagad adtuonon labi na sa mga batan-on. Ang uban padung sa gawas sa nasod labi na niadtong naka kuha ug promo sa mga airline companieas.
Samtang nangandam ang mga bakasyonista ang simbahang Katoliko nagpahinumdum sa tanan nga ang nagsingabot nga kuwaresma di pakalimtan. Bitaw pila na ba ka ting bakasyon nga pulos suroy lang ang gihimo sa uban ug nakalimtan ang mga kalihukan sa Semana Santa.
Responsabilidad ni sa mga ginikanan pagpahimagno sa ilang mga anak nga di magpatuyang sa ilang gibati hangtod nga makalimot nalang sa mga kalihukan sa simbahan. Hinuon sa matag distinasyon nga adtuon naa ma’y simbahan nga sarang kaanpoan. Unta di ni makalimtan. Maayong pagbiyahe mga bakasyonista.
Pero sa mga di ka bakasyon tungod sa trabaho, sama sa mga bag-alagad sa mga hospital, airport, mga security guards ug sa ubang sakop sa media siguro ang arong mahimo mao ang paghabdum nalang sa mga minahal sa kinabuhi nga atong bisitahonon. Ang uban kutob ra gyud sa pagpangandoy nga ika uban pag-usab ang ilang mga minahal pero tungod sa kahagip-ot sa panahon ug ka kuwang sa budget kutob ra sa pagdamgo.
MAHAL
Sa mga gustong magdali ang daling mapara mao ang taxi. Sa mga gusto ug komportabli nga biyahe taxi maoy madali dali. Ambot mao pa ba gihapon ni ang naa sa inyong hunahuna karon nga nisulbong na ang plitihan basi sa bag-ong calibration.
Nakasakay ko ug taxi sa niaging Sabado tungod sa kadinalian sa akong lakaw. Sama sa kasinatian sa uban grabe gyud ang pagsaka sa plitihan basin sa bag-ong taripa.l. Sa uban nga daghan ug sapi di ni problema. Pero sa mga ordinaryong mamumu-o sama nako bug-at ra kaayo. Matod sa taxi driver nga akong gisultian sa akong obserbasyon, mao sab ni ang reklamo sa uban niyang pasahero. Pun-an pa sa problema sa trapiko mosamot ka mahal ang plite.
Matod sa driver plano niya nga moundang nalang ug drive ug mouli sa probinsiya. Di na ko mahibung sa iyang plano. Gani daghan na nila ang nagdrive ug habalhabal, nag-family driver ug bisan unsa nalang nga masapian.