Super Bilib: Ang 3 ka mga tig-tattoo

ANG tattoo industry sa Sugbo nagpadayon sa paglambo ug pagdako, makita ang pagdaghan sa mga tat­too shops ug mga tattoo artists nga nag post sa ilang art works sa social media.

Usa sa mga artists nga Sugbuanon nagtukod og shop nga adunay tatak Cebu, ang 032 Tattoo Shop na nahimutang sa J. Llorente St. , Cebu City.

Ang 032 Tattoo Shop nga gipanag-iya ni Chow Abinales nagsu­god niadtiong 2010. Iyang tumong nga mapadayag ang art form ug ang talento sa mga artists sa Sugbu.

“Ako gi-name 032 Tattoo Shop kay mao ni ang area code sa Cebu. Inig kita sa tawo, maka-ingon na Cebu jud ni and mga artists, Cebuano,” matod ni Abinales, kinsa mao usab ang organizer sa Sinamarai Tattoo Competition.

Matod ni Abinales, 35, nga dako nga kausaban sa tattoo industry karon kay nawala na ang saunang perception sa tattoo ug gihangop na kini sa kadaghan uban ang konsepto niini na usa ka art.

“Karon nakasabot na ang kadaghan sa tattoo. Sa una kay kon naa kay tattoo ang e think da­yon kay cri­minal. Un­­like ka­­ron na halos tanan interested sa tattoo, hasta mga professionals naay mga tattoo,” dugang ni Abinales.

Kauban in Abinales sa 032 Tattoo Shop kay sila si Jayland Remoriras, taga Labangon, ug Alex Cabrijas, taga Guadalupe. Sila mag-barkada na daan sa wa pa natukod ang tattoo shop.

Matod ni Abinales nga importante sa tattoo shop ang high standard, safety ug professionalism para makahatag og maayo na serbisyo sa mga kustomer.

“Among gamit authentic tanan and we only use legit inks. Mag-order gyud mi gikan sa America. Naa mi sanitary permit, business permit and we comply on the permits kailangan sa go­vernment,” ingon ni Abinales.

“Lain-lain pud mig forte, kaming tulo ka artists. Ako is more on Japanese and colored designs, Jayland is more on portraits and realism, ug si Alex is more on the traditional designs. Pero all of us are flexible depending sa demand a clients,” matod niya.

Si Abinales, amahan sa upat ka mga bata, niingon nga ang ilang inspirasyon sa ilang pag tattoo ilang mga anak.

Si Abinales, kinsa nag-idol kang American tattoo artist Nikko Hurtado, nagsugod pagpamatik pag high school niya ug didto nagpadayon na iyang interest sa pagpamatik.

“At first wala sa akong mind nga mga open og shop. Nag start ko mga amigo nako, ako patikan, pero nagkadugay, nagkadaghan akong clients. Mao to ako na think nga mag open na og tattoo shop,” matod ni Abinales.

Sa iyang career, si Abinales naka tattoo na sa mga players sa Philippine Basketball Association (PBA), commercial models ug mga celebrities.

Sa niaging semana, ang mga artists sa 032 Tattoo Shop tua sa Manila para mo tattoo sa mga basketball pla­yers nga sila David Semerad, Brian Heruela, Chris Ross ug uban nga cagers sa San Mi­­guel Beermen.

Sa iyang kasinatian sa pag tattoo, si Abinales adunay pahimangno sa mga nagplano nga mag pa tattoo.

“Think more than five times jud sa inyong design kay forever nana sa inyong panit,” matod niya.