GIAWHAG sa Konseho ang Cebu City Transportation Office (CCTO) sa pagtuon sa paghimo nga one-way traffic sa dalan Tres de Abril, eskina F. Llamas paingon sa E. Sabellano alang sa mga sakyanan nga mopaingon sa habagatan gikan alas 5 sa hapon hangtod alas 9 sa gabii.
Si Konsehal Raymond Garcia nipalabang og resolution aron pormal nga awhagon ang CCTO nga gipangulohan ni Francisco Ouano para mahatagan og alibyo ang kahuot sa mga sakyanan sa hapon hangtod sa gabii.
Si Mayor Tomas Osmeña way supak sa gitinguha ni Garcia ug nagpasalamat ang mayor nga bisan kon anaa sa oposisyon ang grupo ni Garcia, nagpakabana gihapon kini sa problema.
Sukad sa pagsugod sa construction sa dul-an P700 milyones nga underpass sa Mambaling, nakasinati og di tiaw nga kahuot sa dagan sa mga sakyanan ang mga motorista nga mopaingon sa south district nga di moagi sa South Road Properties.
Ang Department of Public Work and Highways nisirado sa tibuok construction site paingon sa south samtang one lane ang gitagana alang sa mga sakyanan paingon sa kinapusaran sa dakbayan.
Ang mga sakyanan nga gustong moadto sa Pardo gi-divert sa CCTO sa dalan Katipunan, Tres de Abril, dalan Elorde, eskina Macopa subay sa F. Llamas lahos sa E. Sabillano ug vice versa.
Para mokunhod ang traffic sa eskina F. Llamas paingon sa E. Sabellano, si Konsehal Dave Tumulak nakig-alayon sa Our Lady of Lourdes Parish aron mapaagian ang ilang compound gikan alas 6 hangtod alas 10 sa buntag ang gikan sa E. Sabellano ug alas 4 hangtod alas 9 sa gabii ang gikan sa F. Llamas.
Gamay ang dalan
Gipadayag ni Ouano nga lisod himuon ang one-way traffic scheme nga maoy gisugyot ni Garcia gumikan sa kahagip-ot sa dalan ug ang pag-usab-usab sa traffic situation depende sa kalambuan sa construction sa underpass.
Matag alas 4 hangtod sa alas 8 sa gabii, gitugotang makaagi sa one lane sa Shopwise ang mga sakyanan nga paingon sa south sanglit ilang nakita nga gamay ra ang gidaghanon sa mga sakyanan nga mopaingon sa city proper.