BANGI sa illegal nga drugas ug negosyo sa illegal nga sugal ang gitan-aw nga motibo sa kapulisan sa pag patay sa kanhi konsehal sa syudad sa Talisay nga si Emelio Go tungod kay siya nalakip sa watchlist sa Police Regional Office (PRO) 7.
Duha ka oras nga nagpaabot ang Superbalita Cebu aron kuhaan og mga pamahayag ang pamilya ni kanhi konsehal Emil Go, apan nagdumili kini sa pag-atubang.
Ang hepe sa Cebu Provincial Police Office nimando sa kapulisan sa syudad sa Talisay sa pagsubay sa tanang mga angulo sa pagpusil sa kanhi konsehal.
Matod ni Sr. Supt. Edgar Alan Okubo, ang labing duol nga iyang gitan-aw mao ang bangi sa illegal nga drugas sanglit nalakip si Go sa listahan sa PRO7 nga nalambigit sa illegal drugs ug illegal nga sugal sa maong syudad.
Lakip sa gipasupot nga direktiba ni Okubo sa mga imbestigador nga mohipos sa mga ebidensya sama sa kuha sa CCTV camera sa dapit diin.
“So, I told the chief of police to also check rivalries kasi nasa listahan eh,” matod ni Okubo.
Kalambigitan?
Lakip sa ilang tan-awon kon wa bay kalambigitan ang nahitabong pag banhig patay kang PO2 Romeo Bolaño sanglit susama ang pamaagi ang mga suspek ninggamit og Pajero isip sakyanan.
Ipasubay usab nila ang suway nga pagpatay sa kanhi deputy jail warden sa Talisay nga si Jail Inspector Edwin Sarcon tungod sa mga sirkumtansya nga mga nahitabo sa maong syudad sa dihang nadestino pa sa bilangoan sa Talisay.
CCTV
Ang pamilyang nagdumili sa paghatag og kopya sa kuha sa CCTV camera ngadto sa kapulisan.
Kagahapon sa buntag nibalik ang mga imbestigador sa kapulisan sa Talisay sa crime scene, diin ilang nasuta nga tulo ka mga CCTV camera ang naa sa gawas samtang laing usa usab sa luyong bahin.
Apan ang mga pulis napakyas pagkuha og kopya sa footage, diin matod pa nakita ang duha ka mga sakyanan nga gisakyan sa killer.
Samtang lakip sa nakit-an mao ang gunman nga mikanaug sa sakyanan, apan giingong hanap ug di maayo ang kuha.
Matod ni Insp. Inar Vic Florece, deputy chief sa Talisay Police Station, nga tanang mga anggulo ang ila karong gisubay.
Giangkon ni Florece nga nakakuha silag kasayuran labot sa pagkatawo sa namatay ilabi na ang giingong pagkalambigit sa illegal nga sugal.
Apan daling giklaro ni Florece nga walay ebidensiya nga direktang nagtumbok nga si Go may kalambigitan sa illegal.
Lakip sa ilang susihon kon wala ba kini nadawat nga hulga ug aduna bay gikaaway sa wa pa ang pagpusil.
Nagkanayon si Florece nga mangita usab silag laing kopya sa CCTV sa mga dapit nga posebling maoy ilang giagian sa pagdayon na og sibat.