SA kasaysayan sa pamolis dinhi sa ato karon pa ni mahitabo nga ang tibuok puwersa sa usa ka police station ilisan ug bag-ong hepe ug iyang ginsakpan. Kasagaran dunay usa o duha nga nakasala ang tangtangon ug ibalhin ug laing assignment. Pero ang nahitabo sa Parian Police Station sa dakbayan sa Sugbo bag-o sa atong pandungog.
Gimando niadtong Martes ni C/Supt. Robert Quenery ang pangulo sa Police Regional Office 7 nga taposon sa 39 ka polis kauban ang ilang hepe ang ilang pagpangalagad sa maong estasyonan sa kapulisan kay may mga kauban silang gipasanginlan nga nagpabadlong.
Kining pagpabadlong sa ubang sakop sa PNP unya nasakpan dugay na ning bisyoha. Ang uban gipasakaan ug kasong administratiba ug krimina. Dunay mga napamatud-an nga inosente sa pasangil. Duna sa’y uban naprobahan nga sad-an ug nataktak gikan sa serbisyo. Ang uban igo lang nga nasuspenso ug nakabalik sa estasyonan nga gialagaran o nabalhin lang ug laing assignment.
Ang nahitabo sa Parian lahi. Napagan ang mga wa’y labot ug gipaubos karon ug 15 ka adlaw nga re-training . Di ko kahinumdum nga dunay ingon niini nga panghitabo dinhi sa ato sa ja dugay na nakong cover sa police beat.
Gipasabot sa taga PRO-7 nga di silot ang pag dismantle sa puwersa sa Parian. Paagi daw ni nga nakulit sa bibliya sa pamolis tungod kay dunay nagpabadlong. Human sa Parian unsa na sab kaha nga police station ang matay-og.
Nipuli
Kay mag gikan man sa mobile force company ang gipahibalo nga maoy ipuli, ang akong nakita nga nag duty didto pagka ugma mga pulis nga kasagaran nadistino sa bukid. Mao ni sila ang nag-alagad sa mga bukirang barangay. Ang uban nakatilaw na og assignment sa police station. Pero kasagaran karon pa nakasulay nga madistino og police station sukad sa pagka pulis.
Nindot ni nga kasinatian. Hagit sab ni nilang tanan apil na ang ilang bag-ong hepe pagmatuod nga kung unsa man ang ilang gipakitang labok sa bukid mahimo sab sa patag. Ang ilang training sa pagka oulis para man sa tanang dapit. Way gipili. Mao nga angay nilang kat-onan ang bag-o nilang assignment ug pamatud-an nga ang ilang gipanumpaan nga serbisyo makapahimuot sa katawhan sud sa ilang area of responsability kun AOR.
Advisory
Si Kapitan Raquel Avila sa Barangay Kamagayan nisugilon diri nako sa mga problema nga angay tutukan sa bag-ong liderato sa Parian. Nag-una sa iyang gipanghisgutan mao ang iligal nga druga.
Si Kapitan Avila maoy pangulo sa Advisory Council nga gilangkuban sa mga kapitan sa pito ka barangay nga ubos sa hurisdiksiyon sa Parian. Ang ilang grupo kauban ang hepe magtagbo matag karon ug unya aron tukion ang mga problema sa teritoryo.