Ang biseklita

KANIADTO, niingon ko nga di ko mosakay og 29-inch wheel nga mountain bike kay alang nako, dako ra kaayo sa akong body size. Nakahuna-­huna ko nga mas maayo ang 27.5-inch wheel.

Sa akong pagbalik sa pagsi­kad sa bukid ning bag-o lang, nangutana ko og pipila ka bikers nga nakaagi og 27.5 ug 29-inch wheel. Ang ilang giingon nga mas maayong modiretso sa 29-inch, inay mag 27.5. Busa, dihang nakakita kog opportunity, nikuha ko og Niner nga mao na karon ang akong gigamit sa pagsikad sulod na sa pipila ka mga higayon. Kon itandi sa 26, duna kini deperensya sa kagahion sa pagtungas, apan sa ako nang ginaingon, mas nindot padulhogon ang dako og ligid kay mas stable alang nako.

Akong gibase ang akong assessment sa akong gigamit nga gidak-on sa sprockets sa pagtungas. Sa 26-inch wheel, ari ko sa 28-tooth kutob kon magkadugay na ang akong sikad samtang sa akong atubangan ang 26-tooth ring.

Karon nga 29-inch wheel na ang akong gamit, sagad ari ko sa 37 o 40 nga sprocket. Dinhi nimo makita ang deperensya. Busa, sa sama nako nga di kaayo kusgan motungas tungod sa limitation sa akong lawas nga akong nadiskobrehan niadtong 2014 nga medical check-up, struggle ang paspas nga tungas.

Mao usab ni ang review sa ubang riders nga akong nabasa sa nagkadaiyang websites. Apan alang nako nga di manglumbaay, wa koy problema sa acceleration. Okay ra nako ang 29-inch kay ari man usab bawion sa dulhog.

Busa kon mangutana ka kon mas ganahan ko sa 29? Kon uso ang hisgutan, mas okay kini. Apan kon sayon nga tungas, ari ko sa 26-inch. Kon tight ka sa bulsa, ang imong mountain bike maoy kalingawi. Alang nako, kon asa ka malingaw, diha lang una kutob.

Magkagaan

Sa bisan unsa nga imong pagahimuon, magkadugay mag­kasayon o magkagaan. Sa una, grabe ang pagpanakit sa akong kalawasan. Ang una nako nga long ride mao ang gikan sa Cebu City padung sa Carcar City uban sa among kanhi photographer nga si Allan Defensor. Huwebes Santo kadto sa 2010. Nauli ko sa balay sa alas 4 sa hapon.

Di ma-describe ang kasakit sa akong kalawasan kay wa pa maanad ang akong lawas sa lagyo nga biyahe. Sa akong cyclometer, mga 115 kilometros ang akong gi-travel padung ug balik dinhi sa siyudad. Tungod sa ka sakit sa akong gibati, naglisod ko sa pagkatulog.

Sugod ra

Ang sakit sa sugod ra na. Samtang magkadugay ka og si­kad, di ka na mobati og ka­sakit kay naanad na ang imong lawas. Sama ra na siya og relasyon sa gugma. Kon magkabuwag, ang kasakit sa sugod ra. Magkadugay, mawagtang ra kay naanad ka na.