ANG uban nibiyahe na. Ang uban nag-impaki pa. Ang uban nagsabot pa. Samtang ang uban magpabilin ra tungod sa daghang rason. Mao ni ang sitwasyon sa ubang pamilya ning panahon sa Semana Santa. Sanglit taas taas ang lugway sa mga adlaw nga way trabaho ug wa sa’y klase para sa ubang eskwelahan mao nga ang mubo nga bakasyon nga gihisgutan. Dunay gustoug dagat. Duna sa’y gusto ug bukid.
PANGANDAM
Tungod kay dagat ug bukid ang puntarya sa libo ka libo nga nibiyahe ug mobiyahe pa maisip nato ang kadaghanan nila mga estranghero sa tagsa tagsa nila ka distinasyon. Kabahin ni sila nga bantayanan sa atong kapulisan ug mga tinugyanan sa Disaster Risk Reduction & Management Council sa mga lungsod ug ciudad. Sa kamanduan nga giluwatan sa Police Regional Office 7, gipahinumduman ang mga hepe nga kanunay’ng igmat batok sa bisan unsang panghitabo nga maka pakgang sa kahusay ug kalinaw. Sa mga dapit nga dagsaunon kaayo ug mga tawo sama sa isla sa Bantayan ug habagatang Sugbo mas daghang pulis ang gipakatap didto. Apan wa ni magpasabot nga kung mingaw ang lugar kay way turista nga nasaag molugak ang kapulisan sa ilang pagpangandam.
Sa lungsod sa Moalboal, akong naestorya ang ilang hepe nga si C/Insp. Jose Rovic Villarin ug nipahibalo nga aktibo nilang gipatuman ang programa sa lungsod labot sa paghakot ug mga bisita padung sa mga suroyanan sa kadagatan. Kinahanglan nga way mopahimus pagpangayo ug taas nga plitihan.
Ako man ganing gisugyot nga sama sa porter sa pantalan may numero ug mga pangalan nga nakasipra sa ilang T-shirt aron sayong ilhon kung motumaw ang reklamo. Mao sab unta ni ang buhaton sa ubang dapit nga nag-atiman ug mga bisita sa mga baybayon ug kabukid. Apil na ang mga habal habal driver. Dasigon nato sila nga mag-uniporme unya siprahan sa ilang pangalan ug numero ang likod sa ilang t-shirt. Sa habig sa kapulisan mas dali ang pagsubay kung may motumaw nga reklamo. Ang gatosan ka habal habal driver diha sa Mambaling maoy unang nagpasiugda niini ug para nako epiktibo kaayo.
LAPULAPU
Sama sa dakbayan sa Sugbo ug Mandaue ang pagbaha sa daghang tawo sa mga dagkong simbahan maoy tutukan sa taga station 3 sa Lapulapu City. Ang ilang hepe nga si C/Insp. Junnel Caadlawon nilista sa simbahan sa Birhen sa Regla nga usa sa priority area.
Gisundan ni Muelle Osmeña wharf ug mga terminal sa PUJ, GT Express ug tricycle. Unya sa di pa ta makalimot atong awhag sa mga hepe palihug sa pag-display sa mga numero sa cellphone ug landline sa mga dapit nga dagsaon sa mga tawo nga mahimong matawgan 24 oras. Kanang numero nga naa gyu’y motubag.