KON way kakulian ug kon buligan usab sa panahon, hayag ang posibilidad nga human sa pipila ka buwan makaaway na og balik ang Sugboanong world prospect ug undefeated nga si Jhack Tepora.
Usa ka kasaligang tinubdan ang mibutuyag nga posibling usa si Tepora sa paawayon sa undercard sa umaabot nga away ni Filipino ring icon Manny Pacquiao ug World Boxing Association (WBA) welterweight champion Lucas Matthysse sa Argentina didto sa Malaysia.
Orihinal nga petsa sa maong away gikatakda unta karong Hunyo 24 didto sa Malaysia apan tungod sa selebrasyon sa Ramadan sulod ning buwana, hayan adto na kini sa Hulyo 8 sa sama gihapon nga dapit.
Wala pa man tuod mahingpit ang negusasyon, apan ang tinubdan nagkanayon nga si Tepora paawayon alang sa interim World Boxing Association (WBA) featherweight title nga gihuptan ni Jesus Manuel Rojas Diaz sa Puerto Rico.
Si Tepora kinsa adunay impresibong record nga 21-0, 16 knockouts, taodtaod nang nawala sa eksina ug wa na mahisguti sa boxing community human sa iyang impresibong second round knockout nga kadaugan batok ni Lusanda Komanisi didto sa South Africa sa niadtong Oktubre 22, 2017 aron langkaton ang WBO Inter-continental featherweight title.
Sukad niadto wa na siya makaaway ug kon molapas na gani sa bulan sa Abril, unom ka buwan gikan sa iyang paglangkat sa maong titulo, posibling matangtangan siya sa bakus.
Only the other month, sa usa ka awarding nights didto sa Kaulohan, si Joven Jimenez, ang trainer/manager ni Jerwin Ancajas, mao na mismo ang mitanyag sa 24-anyos nga Tepora sa maong oportunidad, ug kini maoy butang nga atong panghinauton nga mahinayon.
Lain kining pagsukod sa karera ni Tepora alias El Capitan kini si Rojas tungod kay aduna usab kini impresibong record nga 26-1, 19 ka knockouts.
Hinuon edad-edaran na ni kay 31 anyos na man ang panuigon, pero dili lagi ka kompiyansaan, kay gawas nga praktisado, sakto ni sa exposure kay atoa ni permi mag-awayan sa US ilabi na sa Las Vegas.
Human siya mapildi niadtong 2008 pinaagi sa unanimous decision ni Jose Angel Beranza, kini si Rojas wala na sab makaangkon og kapildihan ug mipupo kini og 13 ka daog, duha ang tabla, usa ang no-contest ug siyam ka knockout. Si Tepora nagsugod sa iyang pagka-professional boxer niadtong 2012, sa ato pa, nianang 2008, sa amateur ranks pa siya niining tuiga.
Nagpro si Rojas sa tuig 2016 ug ang iyang unang lima ka away pulos iyang gipang-knockout samtang si Tepora, sa iyang unang lima ka way, tulo ang gipaundang ug duha ang gidesisyon.
So, sa gikaingon ko na, kon wa lay kakulian, oportunidad kini ni Tepora ug kini maoy iyang unang away sukad sa iyang kaminyuon ngadto ni Dinah Commission sa niaging Disyembre. Goodluck, El Capitan. (junmigs0622@yahoo.com)