GIINGONG hitman ni Rowen Secretaria alyas Yawa nga giila nga ikaduhang drug lord sa syudad sa Sugbo napatay sa mga sakop sa Regional Special Operations Group 7 human nisuway og pusil kanila niadtong Martes sa gabii sa Barangay Ermita, Siyudad sa Sugbo.
Ang napatay giila nga si Janice Cabugason 36, kinsa bag-o lang nakagawas sa Cebu City Jail sa kasong pagpamusil, lakip na ang illegal nga drugas.
Matod ni Police Sr. Inspector Ricardo Tero, deputy chief sa RSOG 7, nakadawat sila og tawag sa telepono nga dunay tawo nga nagdala og armas.
Pagsusi sa mga operatiba sa RSOG 7, kalit lang nanagan ang mga tawo sa dapit, apil na si Cabigason nga nagbitbit na sa armas dungan sa pagpabuto makaduha ka mga higayon tumong sa mga pulis.
Nibawos ang mga pulis ug naigo si Cabigason sa lawas, matod pa sa kapulisan.
Si Cabugason patay na pag-abot sa tambalanan.
Matod sa Police Regional Office, sulod gawas si Cabugason sa bilanggoan human malambigit sa mga kaso sa pagpamusil sa syudad ug lalawigan sa Sugbo.
Dugang kasayuran nga nakuha sa RSOG 7, gihimong hitman ni Secretaria si Cabugason sa dihang aktibo pa sa pagpamaligya sa illegal nga drugas sa Barangay Ermita.
“Sa akong nadunggan, hitman kuno ni siya ni Yaw,a katong drug lord nga napatay sa Bohol. Daghan pa tag impormasyon nga ubay-ubay pud ni siyag gipang birahan sa Cebu City pero dili pa nato ma confirm kinsa ni iyang gipamatay,” matod ni Sr. Insp. Ricardo Tero.
Nakuha gikan kaniya ang kalibre 9mm nga pistola ug mga bala nga gi-turn over na sa PNP Crime Laboratory 7 alang sa examination ug cross matching.
Makig-alayon ang RSOG 7 sa Cebu City Police Office aron masubay kon unsa nga krimen ang iyang gikalambigitan.
Gihimong hitman
Ang hepe sa CCPO, Sr. Supt. Joel Doria, nitug-an nga ilang gipangbantayan karon ang bag-ong mga laya gikan sa City Jail human masayri nga ang uban mga gun-for-hire kaniadto.
Ang kasayuran nga nakuha ni Doria gihimong hitman karon sa mga drug personalities aron molikida sa mga wa makabayad sa drugas.
“Pinamonitor natin ito dahil may information tayo na ang mga bagong laya nayan ay ginawang hit man sa mga drug supplier, dahil sila-sila na lang ang nagpapatayan” matod ni Doria.
Niadtong Dominggo, nasikop ang duha ka mga hitman nga nipatay sa usa ka ex-convict nga si Niño Tañajura sa C. Padilla St., Barangay San Nicolas Proper sa syudad sa Sugbo bugti sa P45,000.