NAKADAWAT og kasayuran ang kapulisan nga nakit-an niadtong Lunes sa kaadlawon si Wellington Lim sa Mactan Cebu International Airport uban sa iyang anak lalake.
Nagduda ang kapulisan nga nigawas sa nasod si Lim, apan wa pa matino kon unsa ang iyang destinasyon.
Ang Sunstar Cebu nitawag sa banay nga Lim, apan di na ma contact ang tanan nilang phone numbers.
Ang kapulisan nisusi na ning mao nga impormasyon taliwa sa kakuwang sa kooperasyon sa pamilyang Lim sa gituohang pag-ambush kang Wellington sa miaging semana.
Human sa ambush, si Wellington nga giiingong nidangop sa iyang condo unit, wa moatubang sa kapulisan bisan makausa.
Bisan sa pagkuhag kasayuran kalabot sa Ford Expedition nga maoy girakrakan sa labing minos duha ka mga tawo, nagpabiling tak-om ang banay nga Lim sa kapulisan.
Sutaon unta nila kon duna bay hulga si Wellington sa iyang kinabuhi.
Ang mao nga sakyanan nga bullet resistant gisuwayan sa pagkuha sa duha ka mga tawo.
Ang Ford Expedition giingong gisakyan ni Wellington atol sa pagbanhig niini niadtong miaging semana sa may Archbishop Reyes street, Barangay Camputhaw, siyudad sa Sugbo.
Ang maong sakyanan gi-park sa basement sa condominium diin nagpuyo si Lim.
Ang sakyanan gikustodiya na sa mga sakop sa Scene of the Crime Operation (SOCO).
Matod ni Supt. Ryan Devaras nga wa magpaila ang duha ka mga lalake nga nisuway pagkuha sa itom nga Ford Expedition nga dunay plate number ZKZ 361 sa rason nga ilang ipaayo ang mga lumping tungod sa mga bala nga gipaarak sa maong sakyanan.
Apan gibalibaran ang maong mga lalake sa pulis sanglit sila na ang dunay katungod sa pagkakaron tungod sa insidente sa pagpamanhig.
“According sa chief of police sa station 4 (Mabolo police station) nga naay duha ka tao ang mokuha unta sa sakyanan kay ilang ipaayo daw, pero atong gibalibaran kay ebedensya man na sa crime ang sakyanan,” matod ni Devaras.
Ang Mabolo police station ang nagbantay sa sakyanan nga gipalibotan sa police line ug miabag na usab karon ang Mobile Patrol Group alang na sa pagsiguro nga di kini mahilabtan. (AYB)