DUNAY nangutana nako unsay akong baruganan sa pagdili sa pagsul-ob og taptap sa nawong sa mga nagmotorsiklo nga gipatuman sa Dakbayan sa Mandaue ug sugdan usab sa pagdili karong adlawa sa Dakbayan sa Lapu-Lapu. Mao ba kini ang makasulbad sa mga patay sa nanglabay nga mga semana?
Human gipatuman ang pagdili sa pagtaptap sa nawong sa mga nagmotorsiklo, wa gihapon mahunong ang mga pagpatay. Nagpadayon gihapon kini tungod kay kasagaran sa mga killer wa nay kukahadlok sa paghimo sa mga pagpatay kay bisan di sila magtaptap, mahimo gihapon nga di sila mailhan.
Dunay mga paagi diin makalikay ang naghimo sa krimen nga di mailhan pinaagi sa pag-usab sa ilang nawong ug bayhon, labina kon professional killers na ang maghimo. Naay uban nga magpili sa oras kanus-a ilang himuon ang krimen ug asang dapita nila patya ang target. Kay sa di pa himuon ang krimen, panid-an og maayo ang target ug planuhon ug plantsahon og maayo ang tanan.
Ikaduha, dunay pagtugot sa Mandaue alang niadtong maggamit og surgical mask nga sama sa taptap, mosampong sa nawong. Wa pa ni labot sa motabong sa bahin sa nawong kon mag-full face helmet.
Busa, alang nako mas maayo nga ang presensya sa kapulisan sa nagkadaiyang mga dapit ug paghingusog sa intelligence gathering maoy pagabuhaton, inay ang pagpugos sa mga nagmotorsiklo sa di pagsul-ob og sampong sa nawong.
Kon ipatuman man gyud kini, kinahanglan nga patrabahuon usab ang mga pulis, inay nga magsalig na lang sa mao nga balaud sa trapiko.
Paspas
Sa social media posts, trending ang grabeng trapiko sa southern part sa Cebu City nga grabe na kaayo. Tungod ni sa pagbuhat sa underpass sa Barangay Mambaling. Mga karsada sa palibot ug kadtong naagihan gisirhan.
Fact na ang trapiko sa bisan unsa nga dapit sa Metro Cebu. Sa ako nang giingon, ang presensya sa nagkadaghang motorsiklo ug biseklita maoy timailhan sa kahimtang sa trapiko sa Metro Cebu. Kon maayo pa ang daghan sa trapiko, di ni managhan. Kinsa bay ganahan magbuwad sa init? Apan tungod kay nagdali, modangop na lang sa two-wheel nga sakyanan kay mas paspas ang biyahe.
Mubo
Usa nako ka higala nga European niadto og China sa miaging tuig. Sama nako, nakadayeg siya sa kalamboan sa mao nga nasod sa natad sa imprastraktura ug mga plano nga daghang katuigan ug lanatan. Di sama sa atoa nga kada administrasyon dunay kaugalingong mga plano, busa way continuity sa mga proyekto.