Bargayo grabeng dugo sa krus, gidala sa ospital

NALANDIG sa tambalanan si Gilbert Bargayo dihang gipanaog na siya sa krus diin siya nagpalansang gumikan sa kakusog sa bul-og sa du­go gikan sa iyang tuo nga ka­mot niadtong Biyernes Santo sa lungsod sa Tuburan.

Atol sa ilang gihimo nga eksaminasyon, nasipyat sa paglansang ang ‘hudeyo’ dihang gibitay na siya sa krus uban sa laing duha (apan gihigot ra sila) isip simbolo sa pagpapas sa sala sa kalibutan.

“First time to nako kusog ang bleeding sa dugo sa akong tuo nga kamot. Nasipyat imbis nga diri mogawas ang lansang, natapsingan ang bukog,” pasabot sa 58 anyos nga si Bargayo uban sa pagtudlo sa iyang palad kinsa nagpalansang sa krus sulod na sa 25 ka higayon sukad niadtong 1990 didto sa Tacloban.

Si Bargayo gilansangan sa iyang duha ka kamot ug duha ka tiil ug sa iyang naandan inig kanaog niya sa krus moderitso siya sa dagat para dali ra maalim ang samad apan niadtong Biyernes siya nidiretso sa emergency sa Tuburan district hospital diin siya gitirahan og anti-tetanus ug gipagawas lang human sa pi­pila ka gutlo.

Ang iyang mga samad maa­lim paglabay sa tulo o upat ka mga adlaw.

Hinuon, luwas sa makuyaw nga kahimtang si Bargayo kinsa nagsugod og pagpalansang dihang nag-edad pa siya og 30 apan dihay tulo ka higayon nga napalta siya sa iyang tulomanon gumikan sa gibating allergy sa iyang lawas.

Samtang, gidagsaan sa libuan ka mga tawo ang linawas nga Siete Palabras sa lungsod sa Tuburan nga gipasiugdahan sa ilang munisipyo.

Si Mayor Democrito “Aljun” Diamante nagkana­yon nga kini maoy ikaunom nga su­nodsunod nga pagpalan­sang ni Bargayo sa ilang lungsod.

“Ang Tuburanon man gud majority sa mga molupyo diri mga katoliko, mao na nakita nato nga ang uban nalimot na ni Jesus Christ kon giunsa niya pagpalansang sa krus para pagtubos sa atong mga sala,” matod ni Diamante.

“Usa ni siya ka matang sa pahigmata sa mga Katoliko aron makita nila hilabi na sa kabataan unsa ka pait ang pagpalansang sa krus tungod lang sa pagtubos sa atong mga sala,” dugang niya.

Si Diamante niingon nga hangtod gusto pa si Bargayo nga magpalansang sa krus, siya mosuporta niini.

Gusto ni Diamante nga maila ang Tuburan sa tibuok Pilipinas ug kalibutan nga hugot ang pagtuo sa labaw nga Ma­ka­gagahom.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph