UYON si Gobernador Hilario Davide III sa posibilidad nga idili na ang pagpahigayon sa street dancing ug parada alang sa nagkadaiyang festival sa mga lungsod ug siyudad sa probinsiya sa mga national highway o main road aron pag-menus sa paghuot sa trapiko.
Mao kini ang girekomendar ni Provincial Disaster Risk Reduction Management Office Baltazar Tribunalo human siya nitabang sa pagpaluag sa trapiko sa lungsod sa Minglanilla niadtong Dominggo.
Ang pagpahigayon sa street dancing sa Kabanhawan festival sa lungsod maoy gibasol sa paghuot sa trapiko.
Laing iduso mao ang pagdili sa pagbutang og haya kilid sa national highway.
Buot ni Davide nga kining tanan matun-an aron matubag ang problema sa trapiko.
Anaa sa duha ka oras ang pagka-bara sa traffic sa lungsod sa Minglanilla niadtong Domingo sa hapon, nunot sa pagpahigayon sa Kabanhawan Festival.
Gisirhan ang bahin sa N. Bacalso sa Barangay Calajoan hangtod sa Tungkop alang sa kalihukan.
Nunot niin, gihangop ug giuyonan ni Davide ang sugyot nga idili na unya sa national highway ang pagpahigayon sa kalihukan, di lang sa lungsod sa Minglanilla, kundi lakip na usab sa ubang dapit sa probinsiya nga dunay mga festival.
Matod ni Davide nga tukion niya kini kauban ang mga mayor atol sa ilang workshop sa traffic management karong buwana.
Training
Sa laing bahin, gisugdan ang lima ka adlaw nga training alang sa mga traffic manager ug enforcers sa Metro Cebu nga gipahigayon sa National Center for Transportation Studies sa University of the Philippines.