SO, hugot gyud ang bakus ni International Boxing Federation (IBF) flyweight champion Donnie “Ahas” Nietes nga di siya mosaka ngadto sa superfly o jr. bantamweight class (115 lbs.) kon dili championship fight ang iyang awayan.
Mas palabihon pa niya nga iyang depensaan ang iyang IBF title o kaha moaway alang sa unification bout sa 112 lbs. kay sa moagi pa siya og elimination bout sa 115 lbs. sa di pa siya makaaway og title match (kon modaog).
Sakto ug haom ang desisyon ni Donnie. Nganong moagi pa man tuod siya sa elimination round nga beeing a champion sa lower division qualified man siyang moaway alang sa world title sa higher class.
Pero wa ni magpasabot nga sarado na ang kahigayonan nga mosaka siya ngadto sa superfly division.
Ania ang senaryo. Sa WBO superfly rankings, si Nietes maoy no. 1 samtang ang laing Pinoy nga si Aston Palicte ang no. 2.
Nahiluna sa no. 3 ug no.4 mao sila si kanhi pound-for-pound king Roman “Chocolatito” Gonzales sa Nicaragua ug McWilliams Arroyo sa Puerto Rico.
Mao unta ni silang upat ang gusto sa WBO nga mag elimination - Nietes batok Arroyo; Palicte batok Gonzales.Ang mga modaog mao ang magsangka alang sa nabakanring world title.
Pero ang nahitabo dili lang kay si Nietes kon dili hasta si Gonzales nibalibad niini.
Priority karon sa kampo ni Gonzales nga paawayon una nila ang ilang batos og tune-up fights tungod sa duha sunodsunod ka kapildihan niini sa mga kamot ni WBC champion Srisakit Sor Runvisai.
Sa ato pa, posibling modesisyon ang WBO nga si Palicte ug si Arroyo ang mag-away alang sa world title.
Kon kinsa ang modaog padepensaon sa iyang titulo batok sa no.1 nga si Nietes.
Kon buligan si Palicte, aw hayan mahitabo na sab ang all-Filipino world title fight.
Laing angulo mao nga posibli usab nga paawayon sa WBO og deritso sila si Nietes ug Palicte isip rated no.1 ug no. 2 diin ang modaog ning awaya modepensa sa titulo batok ni Arroyo.
Sa ato pa, kon niabot og dul-an sa 100 ka tuig una pa masubli ang world title fight tali sa mga Pinoy fighters, karong panahona layo ray usa ka tuig nga mahitabo na usab kini.
Si IBF superfly champion Jerwin Ancajas gikatakda nga modepensa sa iyang titulo batok sa laing Pinoy challenger nga si Jonas Sultan sa Mayo ning tuiga.
Kon kaniadto maglikaylikay ta nga di magkaunay ang atong mga boksidor sa mga dagko o world title fights, karon lahi na.
Timaan lang kini nga milambo na og maayo ang boxing sa Pilipinas sama sa Japan, Estados Unidos, Mexico ug ubang mga dagkong nasod diin pulos kataga nasod ang mag-away alang sa titulo.
(junmigs0622@yahoo.com)