DILI sa tanang higayon nga makakita ka og French-inspired Restaurant sa Sugbo nga barato ug lami ang pagkaon.
Apan gipamatud-an sa Macaron Tango Inc., sa lungsod sa Liloan nga usa sila sa mga nagtanyag og French cuisine o linutoang pranses nga angay nga matilawan hilabi na sa katong hingaon.
Si Fernando “Ato” Lepon, ang chef ug tag-iya sa Macaron Tango Inc., hilig usab og French cuisine hinungdan nga dihang gibaligya ang Macaron Tango Cafe sa kanhi tag-iya niini nga usa ka French, ilahang gipalit.
Mao ra gihapon ang mga trabahante apan ang mga Lepon na ang nagdumala.
Tungod kay dili usab hilig og fried food si Ato, sagad sa pagkaon sa ilang bistro kay baked, roasted o sauted.
Oktubre 2017 dihang hingpit nila nga gibuksan ang bistro sa Poblacion, Liloan. Naa kini sa Zamora St. Naa kini sulod sa Toyang’s Bakeshop nga nahimutang atbang sa Panphil Frasco Gym.
Gikan sa P35 nga macaroon, ang Macaron Tango nagdalit pud og Ostrich Steak sa kantidad nga P450.
Sakto! Locally grown nga ostrich, matod ni Ato.
Ang farm salad nagkantidad ra og P55.
Naay apple tart nga usa sa balik-balikan sa mga customer. Ang bestseller nga pizza mao ang “dirty sugar” nga adunay ham, chicken, ug uban pa.
Abli ang Macaron Tango gikan Lunes hangtod Dominggo apan sirado sila matag Huwebes, alas 11 sa buntag hangtod alas 10 sa gabii.
Kon mahiligon ka og macaroon ug labaw sa tanan, French cuisine, angay lang nimo nga bisitahon ang nag-inusara nga French Bistro sa Liloan!
Naa pud diay sila’y kape alang sa mga coffee lovers ug nagkadaiyang blended drinks. Bisitaha na!