ANAA palang gani sa unang tulo ka buwan sa 2018, apan nakatala na ang Cebu City Police Office Traffic Patrol Group (CCPO-TPG) og 2,935 ka mga aksidente sa kadalanan.
Samtang niabot na sa siyam ang patay karong tuiga.
Sukad usab sa Enero 2017 hangtod Marso karong tuiga, niabot na sa 15,218 ka mga aksidente ang natala diin 40% niini mga aksidente nga nalambigit ang motorsiklo o 6,087 sa mao nga gidaghanon.
Subay niini, si Councilor Dave Tumulak, committee chair sa public order and safety, nagkanayon nga sagad sa maong mga aksidente tungod kay di sila (nagmotorsiklo) makita sa panahon sa gabii.
“Kasagaran sa mga drivers of private vehicles, trucks and public utility jeepneys, dili sila kakita sa mga motorcycles,” si Tumulak nagkanayon.
Tungod niini, giaprobahan sa City Council ang pag-amyendar sa Article 14 ug Section 10 sa Article 15 sa City Ordinance 801 sa Cebu City Traffic Code.
Subay sa ordinansa nga gi-file sa konsehal mao ang pag-require sa mga driver sa motorsiklo nga magsul-ob og reflective vest sugod alas 6 sa gabii.
Pasakaan usab sa maong giamendar nga ordinansa ang multa sa makalapas sa balaod.
“Before, ang multa sa tanang traffic violations is only P500 administrative fine, but karon gi-increase nato to P1,000. If ang violator dili kabayad sa admin fine, maka-render siya og four hours community service. If ever there will be charges against them, ang multa is between P3,000 and P5,000 or six months imprisonment,” si Tumulak nagkanayon.
Sa miaging buwan, gihigpitan usab sa Siyudad ang pagpatuman sa no counterflow nga gitan-aw nga usa sa mga hinungdan sa aksidente.
Sukad gipatuman ang policy sa Cebu City Transportation Office (CCTO), nabantayan nga miminos ang mga nag-counterflow.
Dul-an na usab sa usa ka libo ka mga motorsiklo ug four-wheel nga mga sakyanan ang na-impound og usa ka buwan.
Hinuon, si Mayor Tomas Osmena nimando na sa pag-release sa gi-impound nga mga motorsiklo kay nakat-on na ang mga tag-iya niini base sa iyang naobserbahan.
Apan di hinuon tanan tungod kay kadtong dunay pending nga mga multahanan di makalip hangtod di mabayran ang tanan.
Bisan pa niini, ipadayon sa Siyudad ang kampanya batok sa counterflow.