WALAY nakitang sayop si Davao City Mayor Sara Duterte-Carpio ngadto sa kapulisan ug kasundalohan sa natigayong pagdabdab sa rebeldeng New People's Army (NPA) sa napulo ka mga road heavy equipment sa tulo ka managlahing dapit sa Davao City niadtong miaging Sabado.
Kini ang gibutyag ni Mayor Sara human sa ilang case conference tali kasundalohan, Davao City Police Office (DCPO), City Engineers Office (CEO), ug Public Safety and Security Command Center.
Sumala sa mayor nga di mamahay ang mga security units sa maong dapit gumikan kulang ang koordinasyon sa mga contractors ngadto sa mga security units.
"Wala tay nakita nga lapses sa atong mga security units, ang nakita nato is lack of coordination between our contractors and our security units operating that areas," ingon sa mayor sa ambush interview sa mga tigbalita, Huwebes sa buntag.
Gimandoan sa Mayor ang CEO nga kuhaon ang listahan sa mga contractors nga nagpahigayon sa mga road widening sa dakbayan aron makuha ang ilang atensyon sa pagpahibalo sa otoridad.
Luyo niini, gibutyag sab ni DCPO director Senior Superintendent Alexander Tagum nga kulang gayud ang koordinasyon ug responsibilidad sa mga nanag-iya og mga mahalong nga ekipo nga mokuha og kaugalingon nila nga mga security guards.
Nasuta sa imbestigasyon nga wala gayu'y nagbantay sa mga ekipo sa Barangay Callawa, sa Barangay Fatima, Paquibato ug sa Barangay Dalagdag sa Calinan, Davao City.
Mokabat P65 milyones ang kinatibuk-ang danyos sa maong hitabo. (Jeepy P. Compio)