SUPORTADO sa mga opisyal sa dakbayan sa Sugbo ang plano sa Philippine National Police (PNP) nga hinganlan kadtong anaa sa ilang drug list nga mga barangay officials hilabi na nga nagsingabot na ang barangay ug Sangguniang Kabataan (SK) elections.
Si Mayor Tomas Osmeña walay pagsupak sa laraw ni PNP Chief Ronald Bato dela Rosa sanglit daghan sa ilang lista sa barangay officials ug daghan niini posibleng subling magpapili uban sa pagpaubos sa drug test.
Ang mga konsehal nidasig sa kapulisan nga gawas nga ilang nganlan ang mga kandidato sa barangya nga naa sa ilang lista, ila usab kini pasakaan og kaso.
“Why not, so the people will know. The people can judge anyway and let these people explain. Just like me they say I’m a protector of a druglord, fine. You can mention that and file a case so that I can answer it,” padayag ni Osmeña.
Si Konsehal Raymond Garcia, Joel Garganera ug Jerry Guardo walay pagsupak sa tinguha sa kapulisan sanglit gusto nila nga mahibaw-an sa katawhan kon si kinsa ang mga barangay official nga nalambigit sa kalihukan sa ginadiling drugas.
“I agree 100 percent if it’s only to name wa nay problema kay naa mana sa ilang lista and they have verified it already and it’s different if you campaigns against the individual,” matod ni Garcia.
Uyon kaayo ko ana aron maklaro gyud ug mahatagan og katin-awan kon si kinsa ang mga barangay official nga nagpaluyo ug nagsuporta sa mga ginadiling drugas,” Padayag ni Guardo.
“If they name names they must have enough evidence to prosecute bah. Why just contempt on naming why not filing,” matod ni Garganera kinsa gusto nga mapriso ang mga tawo nga gipasanginlan ug mapamatud-an sa korte.
Si Ligglig Maranga sa barangay Suba kinsa naglaraw nga modagan sa pagkakapitan sa ilang barangay nalipay sa maong plano.
“Dako kaayo nakong kahinangop ug kalipay nga mi-abot na gyud ang higayon nga panghinganlan na sa atong kapolisan ang mga Brgy. Officials nga naa sa ilang drug watch list. Nanghina-ut lang pud ako nga mahinganlan gyud ang tanan ug walay tapigan o duphan kay sayod na ang katawhan sa among barangay kinsa ang mga opisyales nga nalambigit aning mga ginadiling drugas ug narcopolitics, nagkinahanglan lang ug kumpirmasyon ang uban,” padayag ni Maranga.