DIHANG bata pa ko, duha ra ang akong gidamgo nga paliton sa makatrabaho na ko- camera ug biseklita. Wa ko ni mahimo kon wa ko mag-edad og 40. Yes, at 40 years old.
Human namatay ang akong anak sa edad nga 5 anyos tungod sa dengue, nausab ang akong panglantaw sa kinabuhi. Akong naamguhan nga mas maayo diay nga maglipay ta ning kinabuhia, inay magpagapos ta sa kahadlok. Atong i-enjoy ang panag-uban sa atong pamilya kay matag minuto nga moagi, di na ikabalik kon kini mausik.
Di nato puy-an ang kaguol taliwa sa kaanindot sa mga ginama sa Ginuo nga naglibot nato, apan wa nato makita kay napuno ta sa kasuko ug kasilag ngadto sa ubang mga tawo. Suwayi og suroy sa kabukiran ug daplin sa baybayon, sama namong mahiligon sa biseklita, lahi ang imong mabati samtang magsud-ong sa mga talan-awon.
Nganong nag mountain biking man ko? Sayo sa buntag, madungog pa nako ang tingog sa mga langgam ug mahanggap nako ang baho sa kakahuyan. Mahinumdom ko ani ko kay nagdaku ko sa amongdapit, nga karon maorag sama na kalangas sa siyudad.
Lahi ang akong bation. Mao usab ni ang rason nga dunay mga higayon, palabihon nako nga mag-inusara sa pagsikad kay mas maka-concentrate ko sa pagtan-aw ug pag-feel sa palibot.
Pagtuon
Dunay daghang mga pagtuon nga ang pag-inusara ug pagsuot sa kakahuyan bisan sud lang sa 30 minutos, dunay dakong impact sa atoang panghuna-huna. Makapa-relax kini sa atoang utok taliwa sa stressful kaayo nga palibot sa trabahoan.
Busa, bisan makausa o makaduha man lang sa semana, gahini og panahon ang pag-inusara ug suroy sa mga dapit nga dunay kakahuyan o daplin sa dagat, magbiseklita ka man o magsakay og four-wheel. Imong masinati ang kalainan.
Inay nga magmika ka lang sa balay magsige og Facebook o magtan-aw og mga salida sa Netflix, gahini og panahon nga makasuroy ka for another environment. Ayaw pagsige og dayeg sa mga dapit sa abroad kay wa mo lang makita, naa diay sa imong duol ang maanindot nga mga talan-awon.
Enjoy sa init
Daghan ang gustong molikay sa silaw sa adlaw, apan matod sa mga pagtuon, duna kiniy maayong epekto sa panglawas ang kainit sa adlaw sayo sa buntag. Ang silaw sa adlaw mohatag og Vitamin D, nga maayo sa atoang panit.
Ang kahuyang sa kabukogan, isyu sa panit ug buhok masinati kon kuwang og Vitamin D ang lawas. Busa, disiplinaha ang imong kaugalingon, mata og sayo, bangon ug pagbuwad sa adlaw samtang mag-exercise bisan 30 minutos lang.
Pag-anad ani kay ang pagsugod mao ray lisod.