KAGAHAPONG adlawa ang kapistahan sa Divine Mercy diin libuan ka mga deboto ang midagsa sa Divine Mercy Shrine sa Ulaliman, siyudad sa El Salvador, Misamis Oriental.
Si Monsignor Elmer Abacahin nga usa lamang sa pari nga nagmisa atol sa kapistahan namahayag nga sa pagsugod sa Santos nga misa namatikdan ang kusog nga pagbundak sa ulan apan atol mismo sa pagsugod sa misa kalit nga nawala ang mga panganod ug nipuli ang mga bitoun.
Nibalik lamang ang pagbundak sa ulan dihang hapit na matapos ang Santos nga misa.
Matud ni Monsignor Abacahin nga timailhan kini nga gipanalipdan sa Labawng Makagagahom nga mabasa og maayo ang katawhan samtang naminaw sa mga pulong sa Ginoo.
Gani, daw ila na nga nadesisyonan nga ipahigayon ang misa sa ilang chapel apan ang chapel mo-akomodar lamang og 3,500 ka tawo ug ang midagsa nga deboto niabot na og 75,000 kapin sa pagbana-bana nga sugod pa niadtong adlawng Sabado midagsa ug nagmuntar og tent aron didto mangatulog.
Niadtong Sabado, Abril 7, mokabat sa 40 ka mga pari ang nagpakumpisal diin gi-akomodar ang 4,000 ka mga mikumpisal.
Mensahe ni Monsignor Abacahin ngadto sa katawhan subay sa kapistahan nga andam ang Diyos modawat kanato bisan pa nga makasasala.
“Kon giabandona na kita, anaa kanunay ang Diyos wala mibiya kanato ug miunong sa mga gutlo sa atong kinabuhi. Makasasala man kitang tananapan dili kita angayan malimot nga kita adunay Diyos nga mapinanggaon, mohatag ug kalingkawasan ug kaluwasan, usa ka bahandianon sa kalouy ang importante moduol lamang kita kaniya,” matud ni Monsignor Abacahin sa kasaulogan sa kapistahan.