GIPAHIBALO ko ni Dr. Alice Utlang nga dunay namusil sa mga langgam nga namuwak diha sa kilid sa South Road Properties (SRP). Ang maong kasayuran iyang nahipos gikan kang Konsehal Nida Cabrera.
Si Dr. Utlang maoy veterenarian sa dakbayan sa Sugbo daan nang nagpasidaan nga di pahilabtan ang mga langgam kay maidlas ug posibling manglayas gikan sa maong dapit. Gidagsa ang maong dapit sa nagkadaiyang klase sa langgam tungod sa ka abunda sa pagkaon. Ug usa ni ron nga gikonsiderar sa mga tinugyanan sa turismo nga usa ka potential nga detinasyon alang sa bird warching activity.
Matod ni Dr. Utlang, magbutang sila ug mga karatula sa palibot nga magpasidaan sa mga may dautang tuyo batok sa mga langgam. Bug-at nga silot ang ipahamtang sa mga masakpan basi sa atong mga balaod.
Ang lain sab nako nga sugyot mao ang pagbutang ug CCTV camera ug pagtunol ug ganti niadtong moreport nga dunay namusil o nipasipala ning talagsaong gasa gikan sa kahitas-an. Dasigon sab nato ang kapulisan ug tanod pagpahigayon ug subsub nga patrolya.
Usa ka educational campaign angayan sab nga pasiugdahan sa buhatan ni Dr. Utlang aron nga makasabot ang mga tawo nganong di kini hilabtan. Sa maong mga paagi mosamot ang pagdaghan ang mga langgam ug magbutang sa dapit sa mapa sa turismo.
Dunay nagsulti nako nga daghan na sa mga langgam diha nga naa na magpuyo. Di ba nindot? Sa mga molupyo duol sa giipunsisokan sa libo ka libo nga langgam tabang mo ug monitor kinsay mosulay ug pamusil diha.
Bird Watching
Kay may plano man nga kini ugmaron asa’y maayo nga karon palang magbutang na ang city hall ug mga tawo nga tahasan sa security sa palibot.
Anugon kaayo kung mahanaw sa atong panan-aw ang mga langgam kung pasagdaan lang gani human sa akong report sa TV Patrol Central Visayas niadtong Huwebes nakadawat ko ug daghang pagdayeg ug sugyot.
Usa na niini mao ang paglimpiyo sa maong dapit. Nagtipun-og ang basura didto. Tag-as ug labong kaayo ang mga sagbot.
Laing sugyot butangan og railing daplin sa karsada paglikay nga di mahulog sa dagat ang mga mosuroy ilabi na sa mga gamay’ng bata.
Sa mga gustong motan-aw sa labing bag-ong attraction ning panahon sa summer suwaye ninyo ug bisita. Duol ra kaayo gikan sa Mambaling flyover.
Sa mga way sakyanan naay daghang habalhabal nga mohatod ninyo didto. Kung duna mo’y teleskopyo palihug dad-a aron mosamot ka nindot ang inyong adlaw. Gidili diay ang pagpakaon sa mga langgam.
Ang giingon ni Dr. Utlang nga free to watch but not to touch.
NIGIMOK
Human ipahibalo nga madayon gyud ang piniliay sa Sangguniang Kabataan (SK) ug Barangay nigimok dayon ang di gyud unta angayan nga tawgon nga politika sa barangay.
Daghan na ang nagsuroysuroy nga gustong modagan bisan kung wa pa’y campaign period. Nanglamano ug nag-estorya og mga programa ug proyekto.
Nipasidaan ang Comelec nga gidili kini. Niawhag sa katawhan pagkuha og picture o video kung naay nangampanya. Ang uban hinuon wa pa kahukom modagan ba o di. Pero angayan nga seryusohon kining pahimagno sa Comelec.
AKSIYON
Niadtong Biyernes nakadawat ko tawag nga napawong ang supply sa koryente sa balay sa akong ugangan.